УИХ-ын чуулганы үдээс хойших нэгдсэн хуралдаанаар  Ерөнхий сайд Ж.Эрдэнэбат ургац хураалтын талаар мэдээлэл хийв.  Мэдээлэлтэй холбогдуулж цөөнхийн бүлгийг төлөөлж УИХ-ын гишүүн Д.Эрдэнэбат АН-ын бүлгийн дүгнэлтийг танилцууллаа.

УИХ-ын гишүүн Д.Эрдэнэбат " 2016 оны УИХ-ын  мал аж ахуйн салбарын  ажлын талаар Засгийн газараас хийсэн анхны дүн мэдээг сонслоо.

Энэ жил 100 жил тохиогоогүй онцгой өвөл болно гэдгийг дэлхийн цаг уураас мэдээлж байна.  Мөн үүнийг Цаг уур орчны хүрээлэнгийхэн ч бас анхааруулж байгаа билээ. Ийм нөхцөлд Ерөнхий сайд Ж.Эрдэнэбатыг мэдээлэл хийж байгаад талархаж байна.

Гэвч хөдөө орон нутагт малчид яаж өвөлжих, ирээдүйн эдийн засгийн хэрэгжилтийн талаар мэдээлэл сонсоогүйд харамсалтай. Энэ мэдээллийг туйлын хангалтгүй гэж үзэж байна. Ерөнхий сайд та төсөл боловсруулж гэж ярьж байна. Өнөөдөр боловсруулах биш хуралдаж шийдэх ажил хэрэгтэй байна. 

Манай улс  2009 оны зуднаар 8.5 сая малаа алдсан. 2015 оны өвлийг олонхиороо давж чадсан. Хаврын тариалалтыг төлөвлөсөн цагт нь дуусгасан. Таны гаргасан мэдээлэл өмнөх засгаас гаргасан ажлын мэдээлэл.

Оны эцсээр 60 сая мал тоологдож 23 төл мал хүлээн авах төлөвтэй байна. Манай оронд мал  70 сая хүрхэд бэлчээрийн хомсдолд орох  тулгамдсан асуудал болоод байна. Гадаад худалдааны идэвхжилт буурч байгаа нь эдийн засгийн хувьд маш муу дохио гэдгийг бид бүгдээр мэдэж байгаа. Засгийн газараас бодит үр дүнгээ гарган ажиллахад АН-аас хамтрахад  бэлэн байна.  Мөн хөдөө орон нутгийн аймгуудын Засаг дарга нарыг томилох ажил удаашралтай явж байна. Ийм нөхцөлд аймгийн Засаг дарга нарыг хурдан томилох шаардлагатай"  гэсэн юм.

Үүний дараа гишүүд асуултаа асууж хариултаа авлаа.  Тодруулбал УИХ-ын гишүүн Д.Эрдэнэбат дүгнэлттэй холбоотойгоор малын махыг эрүүлжүүлэх тал дээр ямар ажил хийж байгаа, экспорт   импортын асуудалд анхаарал хэр хандуулж буй талаар асуусан юм. Түүнчлэн Тариалангийн бүс нутагт малчин тариаланчдийн зөрчил газар авч байгаа. Үүнд анхаарлаа хандуулж эрхзүйн талаас ямар зохицуулалт хийж байна вэ гэдгийг асуув.

Түүний хариултад Ерөнхий сайд Ж.Эрдэнэбат:

“Энэ өдөрийн амгаланг айлтгая.  Миний мэдээллийг Монгол Улсын Засгийн Газараас гэж  хийсэн ажлын тайлангаа тавьсан. Тиймээс аль нэг намынх гэж хийгээгүй. ХХААҮЯ-ны  сайд гадаад томилолтоор ажлаар явж байна.

Махны экспорт,  малаа эрүүлжүүлэх чиглэлээр ОХУ-ын сайдтай уулзаж байгааг хэлье. Бид газрын чинээ ажил хийж далайн чинээ сурталчилаагүй. Бидэнд хийсэн ажил байгаа. Тухайлбал, Малчдын зээлийг зогсоож  үүний оронд үйлдвэрлаж байгаа бүтээгдэхүүнийг нь үнэд оруулъя гэж ажиллаж байна. Хэдий болтол ард түмнээ зээл ав, зээлээр амьдар гэх юм бэ.

Мөн 67 сая малыг экспортлох асуудлыг хэлэлцэж байгаа. Үүнд алс холын орнууд биш ойрхон урд, хойд хоёр хөршдөө экспортлох асуудлаар хэлэлцэж байна. Хоёр хөршийн тухайд  манай улсаас  мах авна гэдэг асуудлыг  хэлсэн.

Тариалангийн бүс нутагт малчин тариаланчдийн зөрчил их байдаг. Газар тариалангийн хуулинд орсон 500 га талбайг өөрчлөх шаардлага байгаа. Тухайн үед газар тариалангийн хуулинд өөрчлөлт оруулах асуудлаар биднийг эсэргүүцэж байхад Д.Эрдэнэбат та эсэргүүцсээр 500 га газрыг хуулинд тусгасан.  ХХААҮ бол ажлын байрыг бий болгодог.  Өрхийн үйлдвэрлэлээр дамжуулж ажлын байрыг бий болгодог. Гэхдээ айл өрхөөс гарсан бүтээгдэхүүн хэрэглэгчдийн шаардлагад нийцэхгүй.

Төмсөөр нь чипс хийж болохгүй.   Тиймээс үрийн аж ахуйг гаргах ажил ярьж байна. Өөрөөр хэлбэл үйлдвэрлэлийн бололцоог нь хангах ёстой гэж үзэж байгаа юм" гэснээр УИХ-ын чуулган өндөрлөв.