Өнгөрсөн долоо хоног улс төр, нийгэм, эдийн засаг гээд салбар бүр үйл явдлаар дүүрэн халуухан өдрүүд болж өнгөрлөө. Удтал яригдсан Эрдэнэт үйлдвэрийн 49 хувийн асуудал шийдэгдэж,  БОАЖЯ-ныхан авлига авч байгаад үйлдэл дээрээ баригдаж шуугиан тарьсан бол "Нүүрс" хөтөлбөрийн гэх хэргээр шүүхээс ял сонссон Л.Гансүх суллагдаж олон хүний магнайг тэнийлгэв. Тэгвэл өнгөрсөн долоо хоногт өрнөсөн үйл явдлыг багц 24 буландаа онцолж байна.

"Эрдэнэт” үйлдвэр, "Монросцеветмент" компанийн талаар авах зарим арга хэмжээний тухай УИХ-ын тогтоолын төслийг өчигдөр чуулганы нэгдсэн хуралдаанаар хэлэлцлээ. УИХ-ын гишүүд саналаа хэлсний дараа Ерөнхийлөгч Ц.Элбэгдорж чуулганы нэгдсэн хуралдаанд оролцож үг хэлсэн. Тэрбээр “Хууль зөрсөн тухай асуудал яригдаж байна. Хэрэв тийм бол Цэц, шүүх гээд хэлэлцэж тогтоох газар олон бий. Хүний газраас шороо атгаад ирсэн хүмүүсээ би дэмжинэ. Хувийн хэвшил рүү дайрна гэдэг бол Монголын сайн сайхан руу дайрч байгаагаас ялгаагүй. Тиймээс сайн ярилцаж байж шийдвэрээ гаргах хэрэгтэй” гэв. Ерөнхийлөгчийг үг хэлж дууссаны дараа санал хураалт явуулахад хуралдаанд оролцсон гишүүдийн 80.3 хувь нь тогтоолын төслийг дэмжиж баталлаа. Ингэснээр “Эрдэнэт” үйлдвэрийн 49 хувийг төрд буцааж авах үүргийг Засгийн газарт өгч байгаа юм.

БОАЖЯ-ны хүрээлэн буй, орчин, байгалийн нөөцийн газрын дарга Д.Даваасамба нарын хүмүүсийг авлига авч байгаад үйлдэл дээрээ АТГ-ынханд баригдаж шуугиан тарьв. Тэгвэл түүнтэй хамт мэргэжилтэн С.Баярхүү, Мөрдөн байцаах хэлтсийн дарга П.Бүжинжав нар хамт байсан бөгөөд тэднийг мөн цагдан хорьсон гэдгийг эх сурвалж мэдээлэв.

Хүрээлэн буй, орчин, байгалийн нөөцийн газрын дарга Д.Даваасамба нь өнгөрсөн мягмар гарагт Говь-Алтай аймагт томилолтоор ажиллаж ирээд маргааш нь буюу өнгөрсөн лхагва гарагт ажилдаа ирж, улмаар тухайн өдрөө авлига авч байгаад үйлдэл дээрээ баригдсан байна. Тиймээс АТГ-ын мэргэжилтэнгүүд Д.Даваасамба болон мэргэжилтэн С.Баярхүү, Үнэлгээ, аудитын хэлтсийн дарга П.Бүнчинжав нарыг баривчилсан аж. Эх сурвалжийн мэдээлж буйгаар Хүрээлэн буй, орчин, байгалийн нөөцийн газрын мэргэжилтэн С.Баярхүү 40 сая төгрөг, Хүрээлэн буй, орчин, байгалийн нөөцийн газрын дарга Д.Даваасамба 150 сая төгрөгийн авилга авсан нь ил болоод байгаа аж. Тэд 600 тонн хуш модны самар хилээр гаргах зөвшөөрөл өгч улмаар үүнийхээ шанд авлига авсан байна.

Харин Д.Даваасамба өмнө нь  аргал угалз агнах хууль бус зөвшөөрөлтэй нэр холбогдож, хэсэг нөхөд АТГ-т шалгуулахаар өнгөрсөн аравдугаар сард хүсэлтээ хүргүүлж байсан аж. Түүний одоогийн хашиж байгаа Хүрээлэн буй, орчин, байгалийн нөөцийн газрын даргын албан тушаал нь самар, жимч, хилээр байгалийн баялаг гаргах, мод бэлтгэх тусгай зөвшөөрлийг олгодог БОАЖЯ-ны хувьд хамгийн чухал албан тушаал. Тийм ч учраас түүнийг тусгай зөвшөөрлийн асуудлаар авлигын хэрэгт холбогдсон гэдгийг эх сурвалж мэдээлэв.

"Нүүрс” хөтөлбөрийг хэрэгжүүлэх явцдаа улсад хохирол учруулсан гэх хэргээр гурван жил зургаан сарын хорих ял шийтгүүлсэн Л.Гансүхийг өчигдөр Төв аймгийн сум дундын шүүхээс магадлангаар суллалаа. Түүнийг магадлангаар суллагдах шаардлагыг хангасан ч материалыг шүүхээс удаа дараа буцаасан талаар өмгөөлөгч нь мэдээлэл хийж байсан билээ. Тэгвэл өчигдөр Төв аймаг дахь Сум дундын эрүүгийн хэргийн анхан шатны шүүх уг дүгнэлтийг хэлэлцээд Л.Гансүхийг магадлангаар сулласан юм. 

24tsag.mn