Энэ жил сурах бичиг хэвлэх тендерийг эрт зарласнаар шинэчлэлийн ажил өнгөрсөн долоо хоногт дууссан. Сурах бичгийг  “Мөнхийн үсэг”, “Би Си Ай”, “Адмон” зэрэг компаниудад хэвлэн нийлүүлж, есдүгээр сарын 1-нээс өмнө орон даяар бүх ерөнхий боловсролын сургуулийн сурах бичгийг нийлүүлж дуусгах аж. Энэ хичээлийн жилд 89 нэр төрлийн сурах бичгийг шинэчлэснээс 27 сурах бичгийг шинээр зохиож, ирэх наймдугаар сарын эхээр худалдаанд гаргахаар төлөвлөжээ. Эдгээр сурах бичгийг зах зээлд худалдах үнэ харилцан адилгүй. Дунд ангийн сурах бичгийн дундаж үнэ 2200 төгрөг бол, ахлах ангийнх нь 3420 төгрөг юм байна. Харин өнгөрсөн жилүүдэд хэвлэгдсэн сурах бичгүүд хуучин үнээрээ борлогдохыг албаныхан хэллээ. Харин зургаан настнуудын сурах бичиг жил бүр шинээр хэвлэгддэг байна. Тэдний үзэх сурах бичгийн дундаж жин 140 грамм, нийт жин 1,5 килограммаас хэтрэхгүй байхаар тогтоожээ.