Өнгөрсөн баасан гаригт МУ-ын Үндсэн хуулийн цэц бага суудлын хуралдаанаараа иргэн Н.Энхбаяр, С.Нарангэрэл, Э.Батшугар нарын гомдлыг хэлэлцсэн. Хуралдаанаараа дээрх гурван иргэнийг нэр дэвшигчээр бүртгэхээс татгалзсан СЕХ-ны шийдвэр үндэслэлтэй байна гэсэн шийдвэр гаргасан юм.Цэцийн шийдвэр дөнгөж гарсны дараа Үндсэн хуулийн цэцийн хэвлэлийн төлөөлөгч “Саяын шийдвэр бол цэцийн эцсийн шийдвэр тул уг асуудлаар дунд болон их суудлын хуралдаан хийх эрх зүйн үндэслэл байхгүй юм” гэж мэдэгдсэн. Харин МАХН-ын зүгээс энэ мэдэгдэл нь өөрөө хууль зөрчсөн гэж үзэж дараах тайлбарыг хийж байна.
Үндсэн хуулийн цэцэд маргаан хянан шийдвэрлэх ажиллагааны тухай хуулийн 3.1.2-т “ Цэцэд маргаан хянан шийдвэрлэх ажиллагааны бага суудал 3, дунд суудал 5, их суудал 7-9 гишүүний бүрэлдэхүүнтэй байна” гэж заасан байдаг аж. Энэ нь юу гэсэн үг вэ гэхээр иргэний гомдлыг үндсэн хуулийн цэц хянан хэлэлцэхдээ бага, дунд, их гэсэн гурван суудлаараа хэлэлцэх ёстой гэснийг гэрчилж байна гэж үзжээ.
Харин тэгтэл иргэн Н.Энхбаяр, С.Нарангэрэл, Э.Батшугар нарын гомдлыг ганцхан бага суудлын хуралдаанаараа хэлэлцээд дунд болон их суудлын хуралдаанаар хэлэлцэхгүй хэмээн мэдэгдсэн нь үндсэн хуулийн цэц эрх өөрсдөө хууль зөрчсөн үйлдэл болж байгаа гэв.
Монгол Улсад шинэ Үндсэн хууль хэрэгжиж эхэлснээс хойш, Үндсэн хуулийн цэцтэй болсноос хойшхи хугацаанд иргэний гомдлыг ингэж хязгаарлаж байсан түүх байдаггүй гэж мэдээллээ.
