ОБЕГ-ын дарга асан П.Даш, тус газрын Улсын нөөц бүрдүүлэлтийн газрын дарга асан Л.Алтангэрэл нарыг төрийн өмчийг хувьдаа завшсан хэмээн өнгөрсөн даваа гаригт Чингэлтэй дүүргийн шүүхээс 3.6 жилийн хорих ял оноосон.
    ОБЕГ-ын дарга асан П.Даш, тус газрын Улсын нөөц бүрдүүлэлтийн газрын дарга асан Л.Алтангэрэл нарыг төрийн өмчийг хувьдаа завшсан хэмээн өнгөрсөн даваа гаригт Чингэлтэй дүүргийн шүүхээс 3.6 жилийн хорих ял оноосон. Тэднийг өнгөрсөн оны есдүгээр сарын 29-нд Хан-Уул дүүргийн шүүхээс Эрүүгийн хуулийн 263.2, 150.3 гэсэн зүйл ангиар ялласан ч Өршөөлийн тухай хуульд хамруулан сулласан юм. Гэвч П.Даш анхан шатны шүүхийн шийдвэрийг “Хуульд нийцээгүй, би улсын хөрөнгө мөнгө хувьдаа завшаагүй. Хэрэг хийгээгүй байхад ял оноосон. Өршөөлийн хуульд хамруулсан хэргээ заавал цагаатгуулна. Нэр төрөө сэргээлгэнэ” гэж үзэн, Нийслэлийн давж заалдах шатны шүүхэд гомдол гаргаад байсан. Түүний гомдлыг Нийслэлийн шүүхэд хэлэлцэн, анхан шатны шүүхийн шийдвэрийг хүчингүй болгосон юм. Ингэснээр түүний хэргийг нэмэлт мөрдөн байцаалт явуулалгүйгээр анхан шатны шүүхээр дахин хэлэлцүүлж, 3.6 жилийн хорих ял оноосон билээ. Харин энэ хэргийн талаар өнөөдөр Нийслэлийн шүүхээс мэдээлэл хийхээр болжээ. Хурал 17.00 цагаас Нийслэлийн шүүхэд болох юм байна.