Үндэсний статистикийн хорооноос Монгол Улсын 2017 оны эхний хагас жилийн байдлаарх эдийн засгийн голлох үзүүлэлтүүдийг танилцууллаа.
Энэ оны зургадугаар сарын эцэст зах зээл дэх мөнгөний нийлүүлэлт 12.8 их наяд төгрөг болж, өмнөх оны мөн үеэс 2.6 их наяд төгрөгөөр өсчээ. Үүнд төгрөгийн харилцах хадгаламж 229.7 тэрбум төгрөгөөр өссөн нь голлон нөлөөлсөн байна. Аж ахуйн нэгж, байгууллага, иргэдэд олгосон нийт зээлийн өрийн үлдэгдэл 12.9 их наяд төгрөг болж, 872.2 тэрбум төгрөгөөр өсчээ. Мөн банкны системийн чанаргүй зээл 1.1 их наяд төгрөг болж, 96.7 тэрбум төгрөгөөр өссөн байна. Харин зургадугаар сарын эцсээр хугацаа хэтэрсэн зээлийн өрийн үлдэгдэл 797 тэрбум төгрөг байсан нь өмнөх оноос 34.7 тэрбум төгрөгөөр буурсан үзүүлэлт аж.
Улсын нэгдсэн төсвийн тэнцвэржүүлсэн орлого 3.3 их наяд төгрөг, зарлага болон эргэж төлөгдөх цэвэр зээлийн хэмжээ 4.0 их төгрөг байгаа юм. Ингэснээр улсын нэгдсэн төсвийн тэнцвэржүүлсэн нийт тэнцэл 740.7 тэрбум төгрөгийн алдагдалтай гарлаа. Ингэснээс тэнцвэржүүлсэн тэнцлийн алдагдал өмнөх оны мөн үеэс 383.2 тэрбум төгрөгөөр буурсан байна. Улсын төсвийн татварын нийт орлого 2.8 их наяд төгрөг болж, 579.5 төгрөгөөр өссөн. Үүнд НӨАТ 233.1 тэрбум, орлогын албан татвар 210.8 тэрбум, бусад татвар, төлбөр хураамжийн орлого 74.7 тэрбум төгрөгөөр нэмэгдсэн нь голлон нөлөөлсөн байна.
Энэ оны эхний зургаан сард Монгол Улс дэлхийн 139 оронтой 5 тэрбум ам.долларын худалдаа хийжээ. Үүнээс 3.1 тэрбумыг экспорт, 1.9 тэрбумыг импорт эзэлж байгаа бөгөөд гадаад худалдаа 1.2 тэрбум ам.долларын ашигтай гарсан байна. Өнгөрсөн оны мөн үетэй харьцуулахад экспорт 913.3 сая, импорт 431.5 сая ам.доллараар өссөн байна. Улсын хэмжээнд хрэглээний бараа, үйлчилгээний үнэ өмнөх оны өмны үеэс 3.3 хувиар өссөн байна. Үүнд тээврийн бүлэг, хувцас, бөс бараа, гутлын бүлгийн бүтээгдэхүүний үнэ өссөн нь голлон нөлөөлсөн хэмээн үзэж байгаа аж.
Монгол Улсад 147.7 мянган аж ахуйн нэгж, байгууллага бүртгэлтэй байгаагийн 75.7 мянга нь үйл ажиллагаагаа хэвийн явуулж байна. Харин бусад нь үйл ажиллагаагаа түр зогсоосон, хаяг нь тодорхойгүй зэрэг шалтгаантай байгаа юм. Улсын хэмжээнд 2016 оны эцэст тоологдсон төллөх насны нийт 26.5 сая хээлтэгч малын 84.3 хувь нь төллөсөн байна. Гарсан төлийн 97.9 хувь буюу 21.9 сая төл бойжиж байгаа нь өмнөх оны мөн үеэс 2.9 саяар өссөн байна. Энэ онд нийт 523.2 мянган га талбайд тариалалт хийснээс үр тариа 390.8 мянган га-д, төмс 15.0 мянган га-д, хүнсний ногоо 8.2 мянган га-д, тэжээлийн ургамал 25.6 мянган га-д, эмийн ургамал 2.6 мянган га-д тариалсан байна.
Аж үйлдвэрийн салбарын нийт үйлдвэрлэл 2017 оны эхний хагас жилд урьдчилсан гүйцэтгэлээр 5.9 их наяд төгрөгт хүрч, өмнөх оны мөн үеэс 1.8 их наяд төгрөгөөр өслөө. Үүнд уул уурхай, олборлох аж үйлдвэрийн нийт үйлдвэрлэл өмнөх оны мөн үеэс 1.5 их наяд төгрөгөөр өссөн нь голлон нөлөөлсөн байна.
Улсын хэмжээнд энэ оны эхний хагас жилд гүйцэтгэлээр 800.3 тэрбум төгрөгийн барилга угсралтын ажил явагдаж байна. Үүнээс 768.2 тэрбум төгрөгийн ажлыг дотоодын аж ахуйн нэгжүүд гүйцэтгэж байгаа аж. Энэ оны эхний хагас жилд агаарын тээвэр 135.7 тэрбум төгрөг, төмөр замын тээвэр 243.8 тэрбум төгрөгийн орлого олжээ. Төмөр замаар 10.3 сая тонн ачаа, 1.3 сая хүн тээвэрлэжээ. Манай улсын хилээр 2017 оны эхний хагас жилд давхардсан тоогоор 2.8 сая зорчигч нэвтэрсэн нь өмнөх оны мөн үеэс 368.5 мянгаар өссан үзүүлэлт юм. Улсын хилээр орсон зорчигчдын 41 хувийг БНХАУ, 20.5 хувийг ОХУ, 11.3 хувийг БНСУ, 4.2 хувийг Япон улсын иргэд эзэлж байна.
