УИХ-ын хамгийн ахмад гишүүн Д.Дэмбэрэлийг чуулганыг эхлүүлэхгүй байна гэж АН-ын гишүүд ихэд зэмлэж байгаа билээ. Энэ нь даамжирсаар МАН-ынхан Үндсэн хуулийн цэцэд хандахдаа тулсан. УИХ-ын гишүүн Ц.Оюунгэрэл “Чуулган МАН-аас биш, хамгийн ахмад гишүүнээс болж гацлаа. Д.Дэмбэрэл хамгийн ахмад гишүүний ноён нуруугаар чуулганыг удирдах хэрэгтэй. Ахмад хүний үлгэр дууриалал хэрэгтэй учраас хуулинд ахмад хүн даргална гэж оруулсан. Бид ахмадаа хүндэтгээд хүлээж байна. Ахмад маань төрөө хүндэтгээд ороод ирэх ёстой” гэж байв. Гэсэн ч Д.Дэмбэрэл гишүүн танхимд орж ирээгүй тул оронд нь Л.Цог гишүүнд спикерийн алх барих боломж хоромхон зуур олдсон билээ. Харин өөрийнх нь хийх ёстой ажлыг хэн нэгэнд шилжүүлсэнд Д.Дэмбэрэл дарга тун дургүй байгаа аж. Тэрбээр энэ нь хууль ёсны зөв, буруу эсэх талаар биш харин өөрийгөө зөвтгөсөн хариу өгсөн нь зарим хүнийг гайхашруулаад авав. Д.Дэмбэрэл гишүүнээс яагаад чуулганыг даргалаагүй талаар асуухад “Би УИХ-ын гишүүдийн тал нь байхгүй хуралдааныг удирдаад зогсож байх хүн мөн үү? Би чинь мэргэшсэн улс төрч, УИХ-ын хамгийн ахмад гишүүн” гэжээ. Мөн “УИХ-ын гишүүдийнхээ талыг нь оруулж чадаагүй байж даргаа сонгуулаад байна гэнэ шүү дээ” гэв.
   Д.Дэмбэрэл бол Монголын парламентад хамгийн олон жил сууж байгаа гишүүн. Харин УИХ-ын даргын суудлаас буухдаа ийнхүү “намын үгнээс гарч чаддаггүй” гэсэн муу үгтэй буцлаа. Уг нь тэрбээр чуулган эхлэхээс өмнө ерөнхийлөгч Ц.Элбэгдоржтой уулзахдаа “намууд эвлэрсэн хойно УИХ-ын даргаа сонгосон нь дээр” гэж хэлсэн аж. Гэсэн ч АН-ынхан яаран сандран З.Энхболдыг томилсноор Д.Дэмбэрэл гишүүн муу нэртэй, УИХ-ын дарга нь хууль бус гэж хэлэгдэх болоод байна. МАН-ынхан өөрсдийнх нь байхгүйд УИХ-ын даргыг сонгосон тул хууль бус гэж бүлгээ байгуулахгүй, байнгын хороонд орохгүй Үндсэн хуулийн цэцэд хандахаар болсон. Д.Дэмбэрэл гишүүнд ийнхүү МАН, АН-ын зөрчил дунд намаа гэх үү, нэрээ гэх үү гэсэн хүндхэн сонголт тулгарчээ.