УИХ-ын гишүүд нам, фракци, эрэгтэй эмэгтэй гэдгээс гадна бас нэг зүйлээрээ ялгарч эхэлжээ. Зургаа дахь удаагийн парламентын гишүүдийн тал нь хуучин сонгогдож байсан “архагууд” бол тал нь саарал ордонд анх удаа хөл тавьж байгаа юм. Шинэ гишүүдийн дунд олны танил эрхмүүд ч байгаа бас олонд танигдах гэж УИХ-д орсон нөхдүүд ч бий гэдэг.
   Тэгвэл энэ шинэ, хуучин гишүүд насны биш, намын биш, хэтэвчний хэмжээгээр биш саарал ордонд өнжсөн өдрүүдээр эрэмбэлэгдэх хандлага гарч эхэлсэн тухай гишүүд хоорондоо ярих болжээ. Ялангуяа саяхан болсон АН-ын хурал дээр С.Баярцогт, “Мон Уран”-ы Б.Наранхүү нарын гишүүд хоорондоо муудалцсан нь үүний тод жишээ болсон гэв. Зарим гишүүдийн ярьж байгаагаар АН-ын хурал дээр шинэ гишүүн Б.Наранхүү саналаа хэлэх гэтэл С.Баярцогт гишүүн “Шинэ гишүүн эрэмбээрээ байгаарай” гэжээ. Энэ нь Б.Наранхүү гишүүнийг ихэд бухимдуулж “Юм ярихдаа яагаад эрэмбээрээ байх ёстой юм? Кноп дарахдаа чи надаас илүүг дарах юм уу? гэж уурсчээ. Энэ мэтээр муудалцаж байх үед нь мөн л “шинэ” гэсэн тодотголтой Ж.Батзандан гишүүн дундуур нь орж “Эрэмбэ гэж яривал би ч гэсэн эрэмбэ ярина шүү. Би бол энэ сонгуульд энэ УИХ-д хамгийн том тойргоос хамгийн олон санал авсан хүн. Цагаа тулвал С.Баярцогтоос илүү эрэмбэ дараа ярина” гэж Б.Наранхүү гишүүнийг өмөөрсөн ч юм шиг, өөрийгөө магтсан ч юм шиг үг хэлжээ. Энэ нь маргаан хуучин гишүүдийн инээдийг хүргээд авсан бол шинээр сонгогдсон гишүүд эмзэгээр хүлээж авчээ.
   Өмнө нь УИХ-ын Тамгын газраас өрөө хуваарилахад Ц.Нямдорж зэрэг хуучин гишүүд өрөөгөө суллаж өгөхгүй, хуучин өрөөндөө байна гэх зэргээр гүрийж байсан. Шинэ гишүүд бол голж шилэлгүй, үг дуугүй оногдсон өрөөндөө орцгоосон юм. Энэ жил парламентад шинэ гишүүн олон орж ирж, шинэчлэгдсэн тул “архаг”-ууд ийнхүү өөрсдийгөө илүүд үзэх хандлага мэр сэр гарах болоод байгаа гэнэ.  Хамтарсан Засгийн газрынхан МАН-ынхантай сөргөөцөлдөж байх зуур АН-ынхан дотроо бас ийн сөргөлджээ. Гэхдээ шинэ, хуучин гишүүдийн ялгаа МАН дотор ч харагдаж байгаа гэдгийг зарим эх сурвалжууд хэлж байгаа юм.