Хятадыг удирдах ирээдүйтэй гэгдэж байсан нөлөө бүхийн улс төрч Бо Силайн эхнэр Гу Кайлай Британий иргэн Нейл Хейвудыг хөнөөснөө хүлээн зөвшөөрч, цагдаа нар ч түүнийг буруутай гэх олон баримт олжээ. Тиймээс өчигдөр түүнийг баривчилсан гэж "Синхуа" агентлаг мэдээллээ.

   Хейвуд өнгөрсөн оны арваннэгдүгээр сард Бо Силай захирагч нь байсан Чунцин хотын нэгэн зочид буудалд амиа алдсан байсныг олсон юм. Тэр үед Бо Силай Коммунист намыг дараагийн арван жилд удирдах хүнээр нэрлэгдээд байсан билээ. Түүнийг Хятадын Кеннеди гэдэг байв. Хятадын Жаклин Кеннеди гэдэг байсан эхнэр Гу Кайлай энэ үед татвараас зайлсхийсэн хэргээр шалгагдаж байжээ. Тэрээр Нейл Хейвудын тусламжтайгаар гадаад руу илгээж байсан хэдэн арван сая хууль бус долларын хэргийг илрүүлэхгүйн тулд британи иргэнийг алснаа энэ хэргийг шалгаж буй мөрдөгчдөд өчсөн байна. Гу Кайлай англи түншээ хөнөөгөөд зогсохгүй нөхрийгөө Чунцин хотын даргын суудалд байх сүүлийн хэдэн сард хэд хэдэн бизнесмэнээс ихээхэн хэмжээний авлига авчээ.

  Хатагтай Гу хүн амины хэргээ хүлээн зөвшөөрснөөр  Бо Силайн улс төрийн карьер бүрмөсөн булшлагдлаа хэмээн хэвлэлүүдэд бичиж байна.