“Нарантуул” захын босс Ш.Сайхансамбуу УИХ-д гарч чадаагүй уураа хэдэн наймаачиддаа гаргасан аж. Тэрээр түрээсээ нэмэхгүй гэж амласан хэрнээ үл мэдэгдэх шалтгаанаар гэнэт нэмэх шийдвэр гаргажээ.

    “Нарантуул” захын босс Ш.Сайхансамбуу УИХ-д гарч чадаагүй уураа хэдэн наймаачиддаа гаргасан аж. Тэрээр түрээсээ нэмэхгүй гэж амласан хэрнээ үл мэдэгдэх шалтгаанаар гэнэт нэмэх шийдвэр гаргажээ. Тус захын түрээс наймдугаар сарын 1-нээс эхлэн 50 хувь нэмэгдсэн байна. Уг нь Нарантуул захын газрын хугацаа дууссан учир татан буулгана гэсэн сураг гарсан ч 15 жилээр сунгахаар болсон юм. “Нарантуул” дээр ажилладаг наймаачид үүнд нь талархсан ч зөрүүлээд түрээсээ нэмж байгаа нь лангуу түрээслэгчдийг багагүй бухимдуулжээ.  Тохилог худалдааны төв болгож засварлахгүй ч гэсэн бороо цаснаас торгоох ганц дээврийн асуудал ч шийдчихгүй байж ийнхүү үнээ нэмсэнд нь наймаачид маш бухимдалтай байх нь аргаггүй биз ээ. Тэд зун нь наранд шарагдаж, өвөл нь хүйтэн цементэн дээр зогсч амьдралаа залгуулдаг. Гэтэл ажиллах орчин, нийгмийн асуудлыг нь огтхон ч авч хэлэлцдэггүйн дээр боломж л гарвал татвар нэмнэ  хэмээн сүрдүүлдэг тухай наймаачид ярьж байна. Нэг хэсэгтээ “Нарантуул”-ыг сар хаах шийдвэр гарч хэдэн наймаачдаа багагүй сандралд оруулаад авсан. Тус зах дээр наймаа хийдэг хүмүүс банкны зээл, өдрийн зээлээр бараагаа эргэлдүүлдэг учир сарын турш гэртээ суувал хамаг амьдрал нь зогсох нь мэдээж. Иймэрхүү сүрдүүлэг сэмхэн явуулж татвараа нэмэх болсон нь Ш.Сайхансамбуугийн арга заль гэлтэй. Ямартай ч сарын 35000 төгрөгний түрээстэй байсан наймаачид энэ сараас эхэлж 50 мянган төгрөг төлөх боллоо. Энэ талаар Ш.Сайхансамбуугаас тодруулахад, надтай ямар ч холбоогүй, энэ талаар сонссон юм ч алга гэсэн юм. Мөн энэ талаар тус захын наймаачдаас тодрууллаа.

Гутлын лангуу түрээслэгч Н.Наран: Захын урд талын замаа өргөтгөж бас засаж янзлаад, түгжрэлгүй болгочих
     Энэ сараас эхэлж түрээсийн үнээ нэмсэн байсан. Энэ нь бидэнд маш хүндрэлтэй байна. Ядаж л захын урд талынхаа автомашины замын түгжрэл, бөглөрөл гэх мэт асуудлыг шийдэж өгөөгүй байж ингэж үнээ нэмнэ гэдэг үнэхээр хэцүү л санагдаж байна. Одоо энэ замын эвдэрэл, түгжрэлээс болоод зах руу орж ирэх хүмүүс халширдаг болчихсон. Ингэхээр гүйлгээ муудна гэсэн үг. Тэгэхээр наймаа муу байж байхад түрээс нэмэгдэнэ гэдэг бүх наймаачдад л хүндрэлтэй байна даа.

Түрээслэгч Болд: Ядаж барилга байгуулаж барьж өгчихөөд түрээснийхээ үнийг нэмээсэй.
    Хэрэв ингэж үнээ нэмж байгаа бол бид нарыг дотор зогсоодог болох хэрэгтэй шүү дээ. Одоо ингээд л өвөл боллоо. Доороосоо хайрагдаад л үргэлжийн гадаа зогсдог. Энэ асуудлыг шийдэснийхээ дараа түрээсээ нэмсэн ч бид юу гэхэв дээ. Адаглаад Эрээний захаас жишээ аваад үз. Өмнө нь хогийн цэг шиг л хөглөрдөг байсан одоо бүгд л байшин дотор өөр өөрсдийн түрээсэлдэг өрөөтэй. Тохитой, худалдан авагчдад ч амар хялбар. Тэгэхээр барилга байгууламжийн асуудлыг шийдээд өгчихвөл наймаачид түрээснийхээ үнийг нэмж байсан ч бухимдахгүй л байх.

Наймаачин Баттулга: Өчнөөн хүний түрээсний мөнгө авч байж шуналтай юм
Би сарын 35.000 мянган төгрөгний түрээс төлдөг гэтэл 50 хувийг нэмээд 50.000 төгрөг болголоо. Манай энд ямар лангуу түрээсэлж байгаагаарай өөр өөр түрээс төлдөг.  Яагаад ингэж нэмсэн учир шалтгааныг нь мэдэхгүй, хэлээч үгүй. Тэгэхээр энэ олон хүнээс түрээсний мөнгө гэж өч төчнөөн мөнгө авч байж ямар ч учир шалтгаангүйгээр нэмнэ гэдэг тэр хүний шунал дэндэж байгааг л харуулж байна. Өөр юу гэхэв дээ.