Хуучин ерөнхийлөгч Н. Энхбаяр үндсэн хуульд өөрчлөлт оруулах шаардлагатай гээд хэлэлцүүлэг, суртал ухуулга хийгээд явж байгаа бичлэг харлаа. 
Түүн дээр бүх нийтийг дээд боловсролтой болгох ёстой гэнэ. 
Үр ашиг нь юун дээр харагдаж байгааг Израиль улсын саалчинг жишээ болгож ярьж байх юм. 
Тэд дээд боловсролтой учраас нэг үнээнээс өдөрт 60 литр сүү саадаг харин манай малчид боловсролгүй болохоор 3 литр л саадаг гэнэ. 
Энэ чинь боловсролтой саалчиндаа биш хөөрхий тэр боловсролгүй үнээнд нь байгаа юм. 
Айргийн хөхүүр холбоод зүүчихсэн юм шиг дэлэнтэй, түүнийгээ чирээд чадан ядан явж байгаа тэр үнээнд нь байгаа юм. Жаахан эвгүй хэлчихвэл „Хөгжлийн бэрхшээлтэй болчихсон үнээнүүд“. 
Дээд боловсролтой тэр саалчинд мөнгө л олж байвал тэр үнээ хөгжлийн бэрхшээлтэй байна уу, үгүй юу гэдэг ёстой л яамай байлгүй..
Олон улсын эдийн засгийн хамтын ажиллагаа, хөгжлийн байгууллагаас (OECD) жил бүр гаргадаг, уг байгууллагын гишүүн (35 орон ордог) болон түншлэгч орнуудын „Хүн амын боловсролын тухай 2018 оны тайлан“ -г авч үзлээ. 
2016 оны байдлаар эдгээр орнуудын дээд боловсролтой хүмүүсийн нийт хүн амын тоонд эзлэх хувийн жин дунджаар 30 % байх юм (Тоо баримтад 25-аас 65 хүртэлх насны хүмүүсийг хамруулсан байна). 
Энхбаярын нэрлэсэн Израиль улсад энэ нь 36 % -тай. Манай Улсад бол бараг 75 % орчим. Энэ үзүүлэлтээр бид бараг дэлхийн аварга. 
Манай улсад жилд 100 орчим их дээд сургуулийг дунджаар 30 000 орчим залуучууд төгсөөд 50 % (15 000) орчим нь ажилгүйчүүдийн жагсаалд ордог. (эх сурвалж: http://mongolnews.mn/1nac) гээд боддоо. Тэгээд нэмээд л байх уу?
Хэчнээн дээд болон техник бусад дунд мэргэжлийн хүмүүс нийгэмд шаардлагатай байгааг, зах зээлийн эдийн засгийн үед нийгэм эдийн засгийн тодорхой салбаруудад, ажиллах хүчний эрэлт ямар байгааг тооцон, мэргэжлийн боловсролын талаар явуулах улс төрийн бодлогоо төлөвлөж хэрэгжүүлснээр ажиллах хүчээр тэнцвэртэй хангах нөхцөл бүрдэж улмаар нийгэм эдийн засгийн салбарууд тогтвортой хөгжих нэгэн чухал суурь тавигдана.
Их хурлын дарга, Ерөнхийлөгч, Ерөнхий сайд хийж байсан энэ хүн энэ талаар мэдэж л байж таарна. 
Гэтэл ингэж иргэдийн толгой эргүүлж Популизм (манайхан сүүлд попуридах гэж ярьдаг болчихсон) хийж явах ямар хэрэг байна. 
Ер нь Попуридах гэдэг үгийг „бөөндөх“ буюу „улс төрөөр бөөндөх“ гэж монголчилбол зөв ч юм уу!