24tsag.mn сайтын зүгээс уншигч та бүхэнд Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр наадмыг угтан улсын цолонд хамгийн ойрхон байгаа аймгийн цолтнуудыг танилцуулж байна. Бидний энэ удаад танилцуулах бөх Аймгийн хурц арслан Н.Өсөхбаяр.
Тэрбээр 1998 онд Сүхбаатар аймгийн Онгон суманд төрсөн. Түүний өвөө аймгийн хурц арслан Тавхайн Гомбо нь 1957 оны Сүхбаатар аймгийн баяр наадамд түрүүлсэн хүчтэн. Н.Өсөхбаяр 2017 онд Дархан-Уул аймагт болсон үндэсний бөхийн залуучуудын улсын аварга шалгаруулах тэмцээнд түрүүлж, алтан медалийн тоогоо дөрөв болгосон юм. Тэр жил 19 настай Н.Өсөхбаяр нутгийнхаа наадамд зургаа давж аймгийн харцага цол хүртэв. Шахаж татах мэхийг бол “амьдаа аварга” шигээ сурцтай хийдэг. 2018 оны Сүхбаатар аймгийн наадамд аймгийн заан М.Гансүхээр найм давж аймгийн арслан болсон тэр жилийн Улсын баяр наадамд Н.Батсуурь хоёр дахиа түрүүлж, аварга болж байв. Даян аварга Н.Батсуурийг түрүүлсэн он жилүүдэд онцгой сайн барилдсан байна.
Түүний амжилтуудаас,
- 2015 онд Сумын заан болж, 2017 онд цолоо баталжээ.
- 2017 онд Аймгийн харцага
- 2018 онд Аймгийн арслан
- 2022 онд Аймгийн арслан цолоо баталсан.
Бөхийн өргөөний түрүү:
- Нийслэлийн МАН-ын 100 жилийн ойд зориулсан, улсын аварга цолны хүндэтгэлийн барилдаан
- Сүхбаатар аймгийн Онгон сумын 100 жилийн ойд зориулсан, улсын харцага Дахын Одсүрэнгийн нэрэмжит барилдаан
- "Атар" хэвийн боовны нэрэмжит барилдаан
- Дорноговь аймгийн Сайхандулаан сумын харьяат, улсын арслан Гунгаагийн Намжилваанчиг, улсын заан Лувсангийн Сүрэнжав нарын нэрэмжит барилдаан
- Бест Буйдан ХХК-ийн 20 жилийн ойд зориулсан барилдаан
- "Ургацын баяр - 2023"-т зориулсан барилдаан
- Өмнөговь аймгийн Ноён сумын 100 жилийн ойд зориулсан барилдаан
- Дашчойлин хийдийн нэрэмжит, аймаг цэргийн цолтой бөхчүүдийн барилдаан
- Талх Чихэр ХК-ийн нэрэмжит, Хэвийн боовны баярт зориулсан барилдаан
Бөхийн өргөөний үзүүр:
- Шинэ үндсэн хууль батлагдсаны 33 жилийн ойд зориулсан барилдаан
- Өвөрхангай аймгийн Сант сумын харьяат, Монгол улсын арслан Ономжавын Аюурын нэрэмжит барилдаан
- Бүх цэргийн наадам
- Сүхбаатар аймгийн Сүхбаатар сумын 100 жилийн ойд зориулсан, улсын начин Лувсандоржийн Дашдаваагийн нэрэмжит барилдаан
Л.Баяр
