УИХ-ын гишүүн, Олон Улсын Парламентын Холбооны удирдах зөвлөлийн 2018 оны гуравдугаар сарын 28-ны өдрийн шийдвэрийг судалж холбогдох санал, дүгнэлт гарган Байнгын хороонд танилцуулах үүрэг бүхий Ажлын хэсгийн ахлагч Х.Нямбаатар танилцуулав. Энэ нь, төр нийгмийн зүтгэлтэн С.Зориг агсныг хөнөөсөн хэргийг шүүн тасалсан үйл ажиллагаатай холбооттой асуудал билээ. Хэрэг шийдвэрлэсэн байдал зөв, буруу гэсэн маргаан өнөөг хүртэл үргэлжилсэн хэвээр. Мөн хэргийн захиалагч байгаа гэсэн ч тодорхойгүй үлдэж, өнөөг хүртэл хардагдаж яваа Б.Булган шүүх хуралд оролцоогүй. Ядаж гэрчээр ч татагдаагүй гэсэн асуудлыг хөндсөөр байгаа.

Ажлын хэсгийн ахлагч “Олон Улсын Парламентын Холбооны удирдах зөвлөлийн холбогдох шийдвэрт эрүүгийн хэргийн шүүх хуралдааныг олон улсын ажиглагчдыг оролцуулан нээлттэйгээр дахин явуулах ёстой гэж үзсэн байна. Мөн хэргийн шийдвэрлэлтийн явцын талаар Олон Улсын Парламентын Холбоонд тогтмол мэдээлэх, шүүхийн холбогдох шийдвэрийг хуулбарлан авах, холбогдох хууль, эрх зүйн орчны шинэчлэл хийх зэрэг асуудлуудыг хөндсөн. Эдгээр асуудал нь хяналт, шалгалтын чиглэлээр байгуулагддаг ажлын хэсгийн бүрэн эрхийн хүрээнээс хэтэрсэн асуудал. Түүнчлэн тус холбооноос ирүүлсэн бичигт парламентынхаа дэргэд “Парламентын мөрдөн шалгах түр хороо” байгуулах асуудлыг тусгасан.  Ийм хороо байгуулна гэвэл Үндсэн хуульд нэмэлт, өөрчлөлт оруулах асуудал хөндөгдөнө. Тиймээс судалж, санал дүгнэлт боловсруулах ажлын хэсгийг парламентаас байгуулах, уг асуудлаар түр хороо байгуулан ажиллуулах нь зүйтэй” хэмээн танилцуулав. 

Хууль зүй, дотоод хэргийн сайд Ц.Нямдорж “Байнгын хорооны хуралдаанаа хаалттай горимд шилжүүлэх үү. Ерөнхийдөө С.Зориг агсны хэргийг шийдвэрлэсэн шүүх хурлын шийдвэртэй холбоотой асуудлаар мэдээлэл солилцож, нөхцөл байдалтай танилцах, цаашдын үйл ажиллагаагаа төлөвлөх уулзалтыг Байнгын хорооны түвшинд хийх шаардлага үүсээд байна л даа. Нууц гэж хэлээд парламентад үзүүлдэггүй материалуудаа нэг сэтгүүлчээр дамжуулан хэвлэл мэдээллийн хэрэгслээр тавьж байгаа. Гишүүний бүрэн эрхэд халдаж байна, заналхийллээ, дээрх хэргийн өмгөөлөгч нь үг дуугарч чаддаггүй. Яллагч нь “нууц” гээд байсан материалуудаа хэвлэлийн байгууллагад дэлгээд нэг талын тайлбар хийгээд сууж байгаа дүр зурагтай. Үндсэн хуулийн шүүхийн тогтолцоо нурж байгаагийн илрэл гэж би хувьдаа харж байна” гэж бухимдсан юм.

Мөн хууль хяналтынхантай хууль тогтоох байгууллагаа төлөөлөн харилцдаг ганц Байнгын хороо хүний эрх чөлөөний баталгаатай холбоотой нөхцөл байдлыг тодруулж, байр сууриа нэгтгэн, төлөвлөгөө гарган ажиллах хэрэгтэй болж байна. Хуралдаанд оролцсон гишүүд дээрх асуудлыг ярилцан эхний удаад УИХ-ын гишүүдийн санал солилцох уулзалт зохион байгуулах нь зүйтэй хэмээн үзлээ.

Төрийн нийгмийн зүтгэлтэн С.Зориг агсны хэрэг өнөө хэр нь тайлагдашгүй оньсого мэтээр явж ирсэн. Одоо ч хэргийн эзэн нь тодорхгүй гэсэн яриа бий. Чухам хэзээ асуудал тодорхой болох вэ гэсэн хүлээлт нийгэмд үүссэн. Ц.Нямдорж сайд уг хэргийн үнэн бодит байдлыг олно хэмээн хэлж байсан удаатай. Тэгвэл уг асуудал дахин сөхөгдөж, парламентын түвшинд хүний эрх, эрх чөлөө болон бусад баталгаатай холбоотойгоор орж ирэв.

Магадгүй Б.Булган энэ хэрэгт ямар холбоотой, ял шийтгэл хүлээсэн хүмүүс буруутай юу, эсвэл гэсэн олон эргэлзээ таамгийн учиг ч тайлагдах боломж бүрдэх нь тодорхой биз. 

Онц хэрцгийгээр амиа алдсан С.Зориг агсны хэргийн талаар ярих учир Байнгын хороо хаалгаа түгжиж ярилцах шаардлагатай гэж үзсэн. Тиймээс асуудлыг олон нийтэд хүргэхгүй байх үүднээс сэтгүүлчид болон бусад хүмүүсийг танхимаас гаргаж, үүдэндээ харуул хамгаалалттайгаар, цоожтой хаалганы цаана ярилцаж эхэллээ.