УИХ-ын гишүүн З.Баянсэлэнгийг шүүх хурал Чингэлтэй дүүргийн шүүхийн Эрүүгийн танхимд эхэллээ. Түүнтэй хамт МАХН-ын гишүүд болох Б.Батболд, М.Амартүвшин, Я.Мөнхсайхан, Д.Шонхоо нарыг шүүж байна. УИХ-ын гишүүн З.Баянсэлэнгэ Төрийн ордонд "Шударга ёс" эвслийн УИХ дахь бүлгийн  хуралд суусан тул 30 минут хоцорч ирлээ.
    З.Баянсэлэнгийг Эрүүгийн хуулийн 230.1-т зааснаар, бусад гурван шүүгдэгчийг 145.1-т зааснаар шүүж байгаа юм.
   Тэдэнд холбогдох шүүх хурал өнгөрсөн сарын 4-нд Чингэлтэй дүүргийн шүүхэд болж, шүүх бүрэлдэхүүн хэргийг нэмэлт мөрдөн байцаалтад буцаах шийдвэр гаргасан билээ. Харин УМБГ-аас хэргийг шалгаж дуусаад Чингэлтэй дүүргийн шүүхэд шилжүүлээд байгаа юм.
  Тэднийг өнгөрсөн оны арваннэгдүгээр сард Нийслэлийн прокурорын газрын хяналтын прокурор О.Мөнхбаатарын биед халдан, хуулиар хүлээсэн үүргээ гүйцэтгэж байхад нь хүч хэрэглэсэн гэсэн үндэслэлээр Эрүүгийн хуулийн 230 дугаар зүйлийн 230.1, 245.1-д зааснаар эрүүгийн хэрэг үүсгэсэн юм. Өнгөрсөн сарын 4-нд болсон шүүх хурлын үеэр улсын яллагч Ц.Хашбаатар тэдэнд нэг жил зургаан сарын хорих ял төлөвлөснөө дуулгасан билээ.
   Хэргийг сануулбал, Өнгөрсөн оны арваннэгдүгээр сарын дундуур экс Ерөнхийлөгч Н.Энхбаярын туслах Б.Тулгыг УМБГ-аас баривчилсан. Тэрбээр Н.Энхбаярыг Ерөнхий сайд байхаас нь хойш буюу таван жил шадар туслахыг нь хийсэн юм. Энэ  утгаараа түүнийг Н.Энхбаярын гэгдэх “Ремит” ХХК-ийг үүсгэн байгуулж, “Өргөө зочид” буудлыг хариуцан ажиллуулж, хувьчлахад гар бие оролцсон гэсэн үндэслэлээр саатуулсан билээ. Б.Тулгыг саатуулсны дараа Б.Батболд, З.Баянсэлэнгэ, М.Амартүвшин, Я.Мөнхсайхан, Д.Шонхоо нарын хүмүүс түүнийг суллахыг шаардаж, нийслэлийн прокурорын газрын өмнө удаа дараалан жагсаал зохион байгуулж байсан юм. Тэгэхдээ прокурор О.Мөнхбаатарын биед халдсан хэмээн буруутгагдсан байна.