Өнгөрсөн амралтын өдрүүдэд Тээврийн цагдаагийн алба нийт 596 дуудлага хүлээн авчээ. Үүнээс зам тээврийн ослын шинжтэй 413 дуудлага мэдээлэл бүртгэгдсэн байна. Бүртгэгдсэн осол, хэргийн улмаас орон нутагт дөрөв, нийслэлд нэг хүний амь нас хохирч, 16 хүн гэмтэж бэртсэний гурав нь бага насны хүүхэд осолд өртсөн байна. Түүнчлэн согтууруулах ундааны зүйл хэрэглэсэн үедээ тээврийн хэрэгсэл жолоодсон 90 зөрчлийг илрүүлжээ.

Гарсан зам тээврийн осол, хэргийг хэлбэрээр нь авч үзвэл явган зорчигч мөргөж гэмтээсэн 12 осол, мөргөлдөх хэлбэрээр хоёр осол бүртгэгдсэн байна.

Замын хөдөлгөөний дүрмийн заалт шаардлагыг Монгол улсын нутагт нийт иргэд дагаж биелүүлэх үүрэгтэй байдаг. Гэтэл зөвхөн жолоочийн дүрэм, үүрэг гэж үздэг сэтгэлгээ түгээмэл байгаа нь зам тээврийн осол гарахад нөлөөлж байгаа гэж Тээврийн цагдаагийн албанаас мэдээлж байна. Явган зорчигчид гарц, гарамгүй газраар зам хөндлөн гарах, гэрлэн дохио зөрчих, ойртон ирж байгаа тээврийн хэрэгслийн урдуур гэнэт гүйх, автобуснаас буугаад зогсож байгаа тээврийн хэрэгслийн урдуур зам руу орох, зорчих хэсгээр согтуу явах зэргээр тээврийн хэрэгсэлд мөргүүлэх, эрүүл мэнд, амь насаараа хохирох явдал их байгаа аж.

Он гарсаар эхний наймдугаар сарын байдлаар улсын хэмжээнд нийт 18663 зам тээврийн осол бүртгэгдсэнээс явган зорчигчийн буруутай үйдлийн улмаас 390 осол бүртгэгдсэний 327 нь буюу 84% нь нийслэл хотод байна.

Түүнчлэн осол, хэргийн улмаас амь насаараа хохирсон хүний 73 нь буюу 21,3% нь явган зорчигч байгаа нь явган зорчигчдийн хөдөлгөөнд оролцох сахилга, соёлыг дээшлүүлэх зайлшгүй шаардлага байгааг харуулж байна хэмээн онцолж байгаа юм.

Б.Лхам