МАН засагт орж чадалгүй гадна үлдэж, харин Н.Энхбаярын "Шударга ёс" эвслийнхэн АН-тай хамтарснаар хэд хэдэн сайдын суудалтай болж байна. Тиймээс өмнө нь нэг намын нөхөд гэж явсан МАН, МАХН-ынхан нэлээн ширүүн "чулуу" шидэлцэж байгаа. Ялангуяа ХЗДХ-ын сайд Ц.Нямдорж МАХН-ын гишүүд рүү илт дайрч давшлах болсон. Тэгвэл УИХ-ын гишүүн Ч.Улаан үүнд нь хэрхэн хариу өгсөн тухай 24 эшлэлийг хүргэж байна. 

1. Ний нуугүй хэлэхэд энэ хүн бол өшөө хорсол, атаархлаар өлсчихсөн хүн байгаа юм.
2. Хэдэр, ярдаг зан харалган богинохон бодлогоороо өөрийнхөө намд тус нэмэр болохоосоо нэрмээс болчихсон байна.
3. Өдий насны хүн үргэлж хутга зооно, буудна, дорбинкдоно, устгана, зайлуулна гэж ярих ямар вэ.
4. Ц.Нямдорж одоо ямар намд байгаа юм. Анх элссэн нам нь мөн юм уу. Ц.Нямдорж анх МАН-д элссэн юм уу.
5. Дарга дагаж далдаганаж,  олигархи дагаж омойтож яваад МАН-д орчихсон яваа юм биш биз дээ.
6. Богинохон бодол, атаа хорслоор бүдүүлэг үг, давилуун зангаараа шударга, зарчимч гишүүд дэмжигчдээ хазаарлан хорьж, дарангуйлан захирч чадахгүй гэдгээ ойлгодоггүй юм байх даа.
7. Хүн болгон руу сөрвөлзөж, нус нулимсаа үсэргэж явдаг зан бол монгол зан биш.
8. Нийгмийг өөртөө тохируулах гэж нэгэн суурин дээрээ ялбайж, ялзарч сууж болохгүй ээ.
9. Бас шалихгүй мөртлөө давилуун зантай.
10. Хол явахгүй мөртлөө дээрэлхүү байдлаар асуудалд хандах нь нийгэмд өөрийгөө хэн ч биш болгож харагдуулж байна.
11. Урд өмнө хийсэн, бүтээснээ ухаангүй алхам, болчимгүй үйлдлээсээ болж төгсгөлийн шатанд бүгдийг нь баллуурдаж, хар мөртэй гарвал насан туршдаа өөрөө өөрийгөө зүхэж, өөртэйгээ зүхэж, өөртэйгээ тэмцэлдсээр дуусах болно шүү. Өөрөө л харамсах болно доо.
12. Дулмаа минь санагдаад байна гээд уйлж байдаг шалихгүй эр шиг л байх юм.
13. Нийгмээсээ, сайн санаат хүмүүсээсээ ингэж зохиомлоор холдох нь өөрт нь хохиролтой байхгүй юу.
14. Урьд нь Ц.Нямдорж ийм хүн байгаагүй. Аль өнгөтэй өөдтэй, сайн бүхнээ хялайж үзсээр байгаад одоо нөмөр нөөлөг, түшиг тулгуургүй болох, нөхөрлөх нөхөргүй ганцаараа болж байгаа нь харамсалтай.
15. Адгийн наад зах нь  ийм болж зөнөглөхгүй юмсан гэж бодох хүн олон байгаа байх шүү.
16. Ц.Нямдоржийн сэтгэлгээ нь биологийн наснаасаа түрүүлээд хөгширчихсөн юм биш байгаа даа хөөрхий.
17. Ичих ичгүүр ч үгүй юм байна.  
18. Зөвхөн бухимдаал амьдарч болдоггүй юм шүү дээ. Үүнээс сургамж авах хэрэгтэй.
19. Болох, болохгүй зүйл яриад нийгмийн доог болж байгаа хүнээсээ бусад нь ичээд  байгаа учраас намынхан нь дэмжиж үг хэлээгүй.
20. Байгаа байдлыг нь засъя гэхээр наадах нь үг авахгүй байгаа байлгүй дээ.  
21. Нөгөө засал авах үеэсээ өнгөрсөн гэдэг нь энэ биз. Өвчнөөр бол гурав, дөрөв дэх үедээ орчихжээ.
22. Огт өөр асуудал ярьж дүйвүүлж,  нам эвсэл, хүмүүс рүү дайрч давшилж овилгогүйтэж  байна лээ.
23. Ер нь нийгмийн цөөхөн хүн бохирдуулж явдаг юм шүү.
24. Түүнд эрүүл саруул ухаан, уян хатан ухаалаг зохицуулалт, жолоодлого захиргаа нэгэнт байхгүй болжээ.