Өнөөдөр “Шударга ёс” эвслийн бүлгийн хуралд Ерөнхий сайд Н.Алтанхуяг оролцсон. Учир нь шинэ Засгийн газар байгуулагдаж байгаатай холбогдуулан тус эвслээс ажлын хэсэг гарган, зарим яамны чиг үүргийн дагуу Ерөнхий сайдтай уулзая гэсэн билээ. Ингээд Ерөнхий сайд Н.Алтанхуягаас дараах зүйлийг тодрууллаа.
-Өнөөдөр би Шударга ёс эвслийн бүлгийн хуралд би оролцож, Засгийн газрын бүтэц, бүрэлдэхүүний тухай хуулийн төслийг танилцууллаа. Удаан ярилцсаны эцэст ямар нэгэн санал зөрсөн асуудал бараг гарсангүй. Төрийн өмчийн хороо гэх мэтийн ганц нэг агентлагийг хэнд харьяалуулах нь зүйтэй вэ гэдэг санал гарсан. Бусад асуудлыг нэг бүрчлэн ярилцаж тайлбарлаад санал бодлооо солилцоод нэгдмэл саналд хүрч чадлаа. Ер нь “Шударга ёс” эвслийн бүлэг өргөн барьсан Засгийн газрын бүтцийг үндсэндээ дэмжлээ. Харин зарим нэг агентлагийг хэнд харьяалуулах вэ гэдэг асуудлыг дахин ярилцана.
-Аль агентлаг дээр тогтож ярив?
-Төрийн өмчийн хороо өнөөдрийг хүртэл Ерөнхий сайдын харьяанд байсан. Одоо энэхүү хороог Үйлдвэр худалдааны хөдөө аж ахуйн яам руу шилжүүлье гэсэн саналыг Ерөнхий сайд оруулсан юм. Төрийн өмчийн хорооны цаана хэд хэдэн улсын үйлдвэрийн газрууд бий. Харин Шударга ёс эвслийн бүлгийн зүгээс уг хороог өөрчлөх нь зүйтэй. Учир нь энэ хороонд төрийн өмчийн олон компани бий. Захирлуудыг томилох асуудлаас эхлээд төрийн мөнгийг шамшигдуулах хээл хахууль авлига авч өгөх асуудал гардаг. Анх байгуулагдсан энэхүү байгууллага ихэнх үүргээ гүйцэтгэсэн юм биш үү. Тухайлбал, өмч хувьчлалын асуудлаа шийдсэн. Тиймээс Төрийн өмчийн хороогоо задлах, зарим функцийг нь өөр газар руу шилжүүлэх зэргээр өөрчлөлт хийе гэсэн саналыг хэлж байна. Зөвхөн нэг яам руу бус харгалзах яамдууд руу нь шилжүүлвэл яасан юм гэх мэтээр Төрийн өмчийн хороог шинэчлэн өөрчлөх тухай удаан ярилцлаа. Гэхдээ өнөөдрийн засгийн бүтцээр бол уг байгууллагыг бусад газрууд руу шилжүүлэх тухай ярилцах боломжгүй. Тэгэхээр аль нэг сайдад харьяалуулж бичсэний дараа Засгийн газраа байгуулсны дараа хэрхэн өөрчлөл хийх талаараа хэлэлцэх юм. Тиймээс Төрийн өмчийн хороог өөрчлөхөд санал нэгдлээ.
-Ерөнхий сайдын мэдэлд аль аль агентлагийг харьяалуулахаар болж байна вэ?
-Ерөнхий сайдын эрхлэх ажлын хүрээнд шинээр газрын харилцааны асуудлыг нэмж байгаа. Учир нь газар олгох эрх аймаг, хот, дүүрэгт бүх нэгжид байдаг. Засаг захиргааны нэгжээр газар олгож байгаа нь замбараагүй болж байгаатай холбоотой. Хоёрдугаарт, салбарууд газар олгодог. Жишээлбэл, Байгаль орчин аялал жуучлалын яам, Эрдэс баялаг эрчим хүчний яам, Хөдөө аж ахуйн яам зэрэг салбарууд чиглэл чиглэлээрээ газар олгож бодлого нь үнэндээ алдагдсан байна. Иймээс бодлогын асуудлыг Ерөнхий сайдад харьяалалуулах нь зүйтэй гэдэгт санал нийлсэн. Шударга ёс эвслийн бүлгийн зүгээс Ерөнхий сайдын эрхлэх асуудалд нэмж усны асуудлыг хариуцах саналтай байна. Бодлого алдагдсан учраас усны салбарт шинэчлэлт өөрчлөлт хийх нь зөв гэсэн байр суурьтай байна. Ерөнхий сайдад эдгээр асуудлыг хариуцуулна гэдэг нь газар олгоно гэсэн үг биш шүү дээ. Усны, газрын асуудлыг нэг мөр болгоё гэсэн үг.
- Сайд нарын нэрсийг хэзээ санал болгох вэ?
- Засгийн газрын бүтцийн тухай хууль үдээс хойш байнгын хороогоор батлагдсаны дараа аль яамны сайдад хэн байх вэ гэдгийг Монгол Улсын Ерөнхийлөгчтэй зөвшилцөнө. Мэдээж, Шударга ёс, Иргэний зориг ногоон намтай зөвшилцөөд Ерөнхийлөгчтэй зөвлөлдөж дуусаад УИХ-д сайд нарын нэрийг өргөн мэдүүлнэ. Тэгэхээр сайд нарыг томилох асуудал бол бүтцийн дараа ярих асуудал.
Б.Золбоо
