АНУ-ын алдарт “Нью-Йорк таймс” сонины гүйцэтгэх захиралд (CEО) ВВС-гийн ерөнхий захирал Марк Томпсон нэр дэвшлээ. AFP-ийн мэдээлснээр тэрбээр Нью-Йоркийн хэвлэлийн СЕО болбол ерөнхийлөгчийн үүргийг давхар гүйцэтгэх юм. Тус хэвлэл дижитал хэлбэр рүү шилжиж байгаа бөгөөд үүнийг идэвхжүүлэхэд Марк Томпсоны туршлага, арга барил ихээхэн ач холбогдолтой аж. Тэрбээр хэрвээ “Нью-Йорк таймс” сонины гүйцэтгэх захирал, ерөнхийлөгчөөр сонгогдвол ажлаа энэ оны арваннэгдүгээр сараас эхлэх юм.
Сонины хөрөнгө оруулагч, “Нью-Йорк таймс” компанийн захирал Артур Сулзбергер AFP-д өгсөн ярилцлагадаа “ВВС бол дижитал хэлбэрт илүү туршлагатай, чадавхтай болсон. Үүнд Марк Томпсон маш их хувь нэмэр оруулсан. Түүний чадвар бидэнд хэрэгтэй” гэжээ. Гэхдээ захирлуудын зөвлөлийн хурлаар ВВС-гийн ерөнхий захирал АНУ-ын томоохон хэвлэлийн СЕО болох нь шийдвэрлэгдэнэ.
“Нью-Йорк таймс” сонинд одоо дүрстэй бүтээгдэхүүн гаргах, вэб сайтын технологийг шинэчлэх, блогийг багасгах зэрэг асуудал тулгамдаж байгаа аж. Мөн онлайн орчинд байр сууриа бэхжүүлэхийг Артур Сулзбергер хүсэж байна.