Америкийн pingflux.com хэмээх сайт нэгэн сонирхолтой жагсаалт гаргажээ. Энэ жагсаалтад Лондоны олимпоос медаль авсан орнуудыг эрэмбэлсэн бөгөөд ингэхдээ дэлхийн түүхэнд гарсан томоохон гүрнүүдийг тэдгээрийн бүрэлдэхүүнд байсан орнууд XXX олимпоос хэчнээн медаль авсаныг нийлүүлж тооцон байр эзлүүлжээ. Ингэснээр Лондоны олимпоос хамгийн их медаль авсан орон нь Монголын эзэнт гүрэн болж таарч байна. Их Монгол улсын бүрэлдэхүүнд байсан орнуудаас 15 улс Лондоны наадмаас медаль авчээ.
Хятадын 87, ОХУ-ын 82, БНСАУ-ын 28, Украины 20, Казахстаны 13, Ираны 12 гэхчлэн тооцсоор нэг медаль авсан Афганистан, Хонконг, Тажикистаныг хүртэл энэ тоонд оруулснаар Монголын эзэнт гүрний “авсан” нийт медалийн тоо 285 болж жагсаалтыг тасархай тэргүүлсэн байна. Жагсаалтыг зохиогчид удаах байранд 175 медальтай Ромын эзэнт гүрнийг оруулсан бөгөөд одоогийн ИБУИНВУ, Франц, Итали, Унгар, Испани зэрэг 21 орны авсан медалийг үүнд нийлүүлэн тооцжээ. 171 медальтай Британийн эзэнт гүрэн, 164 медальтай ЗХУ жагсаалтад удаалсан бол 104 медальтайгаар Лондоны олимпод тэргүүлсэн АНУ энэ тоогоороо тавдугаар байрт жагссан байна. 87 медальтай өнөөгийн Хятад гүрэн жагсаалтын наймд, 82 медальтай ОХУ 11-д оржээ. Жагсаалтын хамгийн сүүлд буюу 24 дүгээрт МЭӨ VIII-II зуунд өнөөгийн Иран, Египет, Турк зэрэг улсыг эрхшээж байсан Македонийн хаант улс 23 медалиар жагссан байна.
