Оросын Буриадын орчин үеийн дүрслэх урлагийн хамгийн нэртэй төлөөлөгч Даши Намдаков Лондон хотод босгох Чингис хааны хөшөөг урлаж байна. Их Британийн “Halcyon” галерей түүнд энэ хөшөөг бүтээх захиалгыг өгсөн аж. “Halcyon” галерей Лондоны метроны “King’s Cross” өртөөний дэргэд түүнд зориулан томоохон урлан гаргаж өгсөн бөгөөд одоо тэнд хөшөөг хүрэлдэх ажил ид явагдаж байна.

   Оросын Буриадын орчин үеийн дүрслэх урлагийн хамгийн нэртэй төлөөлөгч Даши Намдаков Лондон хотод босгох Чингис хааны хөшөөг урлаж байна. Их Британийн “Halcyon” галерей түүнд энэ хөшөөг бүтээх захиалгыг өгсөн аж. “Halcyon” галерей Лондоны метроны “King’s Cross” өртөөний дэргэд түүнд зориулан томоохон урлан гаргаж өгсөн бөгөөд одоо тэнд хөшөөг хүрэлдэх ажил ид явагдаж байна. Уран бүтээлчийн өөрийнх нь хэлснээр Чингис хааны хөшөөг Лондоны төвийн нэг гудамжинд 2012 оны нэгдүгээр сарын дундуур нээх ажээ. Буриад, төдийгүй Оросын хэмжээнээс хэдийнэ хальж өдгөө нэгэнт дэлхийн хэмжээний уран бүтээлч болсон Д.Намдаков ойрын үед гурван томоохон хөшөөний захиалга дээр ажиллаж байгаагийн нэг нь энэ юм. Үүнээс гадна тэрбээр Татарстаны нийслэл Казань хотод түүхэн сэдэвтэй, Хятадын Шанхайд Нью-Йоркийн Эрх чөлөөний хөшөөтэй төстэй агуулга бүхий аварга том хөшөөг бүтээхээр шамдаж байгаа гэнэ. Өнгөрсөн долдугаар сарын 13-нд Английн хатан хаан Елизавета II-ын нөхөр Эдинбургийн гүн Филипп 90 наныхаа ойгоор Лондоны Бакингэмийн ордонд зохион байгуулсан дээдсийн хүлээн авалтдаа түүнийг урьж биечлэн уулзаж ярилцсан байна.

   Д.Намдаков нь буриад ястан Балжин, Бүдханд нарын найман хүүхэдтэй гэр бүлд Чита мужийн Укурик тосгонд 1967 онд төржээ. Эх эцгээс хайрласан нэр нь Дашням юм. Тэднийхэн удмаараа дархан хэмээх овгийнхон бөгөөд хэдэн үеэрээ дархан, мужаан, инжааны ажил хийж ирсэн улс аж. Д.Намдаков Москвагийн Третьяковын галерейгээс эхлээд Нью-Йорк, Бээжин, Алматы зэрэг дэлхийн томоохон хотуудад 15 үзэсгэлэн гаргажээ. Түүний бүтээлүүд ОХУ, Герман, Франц, Бельги, Швейцарь, Финлянд, Япон, АНУ, Тайвань зэрэг орнуудад, тухайлбал, В.Путин, Ю.Лужков, Р.Абрамович, Г.Шрёдер, У.Турман зэрэг олон алдартан, баячуудын хувийн цуглуулгад бий. Д.Намдаков Оросын урлагийн салбарын нэр хүндтэй бүхий л шагналыг хүртсэний дотор М.Бодровын “Монгол” кинонд зураачаар ажилласан нь түүнд Оросын киноны дээд шагнал “Ника”-г “Шилдэг зураач” номинациар авчирсан билээ. Тэрбээр өдгөө Москвад ажиллаж, амьдарч байна.