Буриадын анхны мэргэжлийн сүмоч Анатолий Михаханов Японоос нутагтаа амрахаар иржээ. Тэрбээр ирсэн даруйдаа Иволгын дацангийн хамба ламд бараалхсан байна. Хамба лам Дамба Аюшеев түүнд “Чи бол буриад зоны бахархал. Хүү чиний төлөө би ямагт залбирч бурхандаа даатгаж байх болно” гэсэн бөгөөд А.Михаханов тун удахгүй зиндаа дээшилж барилдахаа амлажээ.
Буриадын анхны мэргэжлийн сүмоч Анатолий Михаханов Японоос нутагтаа амрахаар иржээ. Тэрбээр ирсэн даруйдаа Иволгын дацангийн хамба ламд бараалхсан байна. Хамба лам Дамба Аюшеев түүнд “Чи бол буриад зоны бахархал. Хүү чиний төлөө би ямагт залбирч бурхандаа даатгаж байх болно” гэсэн бөгөөд А.Михаханов тун удахгүй зиндаа дээшилж барилдахаа амлажээ. А.Михаханов Итгэл хамбад зориулан ном хуруулж, мандал өргөсөн байна. Нутагтаа 10 хонох төлөвлөгөөтэй ирсэн буриад сүмоч Иволгын дацанд гурав хонож, монгол төвд эмнэлгийн эмчилгээ хийлгэх юм. Өнгөрсөн долоо хоногт А.Михаханов Буриадын Айкидогийн анхны холбооны үйл ажиллагааг эхлүүлснээс гадна Улаан-Үдэд болсон төрсөн ах Арслангийнхаа хуриманд хүндтэй зочны хувиар оролцжээ.
Ирэх 11 дүгээр сарын башёд доороосоо дөрөв дэхь буюу санданмэ зиндаанд барилдах энэ залуугийн дэвжээний нэр нь Аврора буюу Оорора гэдэг. Ээжийнх нь ярьсанаар Оорорагийн удамд бөх хүн байсан гэнэ. Өвөө Обогой Обогоевич нь хэлэхдээ, хоёр зуун жилийн өмнө тэдний дээд удамд одоогийнхоор 300 гаруй кг хүнд бул чулууг сэвхийтэл өргөдөг нэг бөх байсан гэж ярьдаг байжээ. Багадаа Оорора их тэнхээтэй хүүхэд байж. Сургуульд ороод удаагүй байхдаа үхэр тэргэнд торхтой цөцгий ачдаг байсан гэнэ. Оорорагийн ах Арслан нь ч өнөөдөр 101 кг жинтэй, 88 см өндөр аж. Гэхдээ спорт хөөгөөгүй, Москвагийн Их сургуульд эдийн засгийн боловсрол эзэмшээд өдгөө Эрхүүд мэргэжлээрээ ажилладаг байна. Харин Оорора 197 см өндөр, 250 кг жинтэй юм. Оорора үүний өмнө 2010 оны зун нутагтаа ирж, төрсөн тосгон Могсоохондоо амарсан бөгөөд өнгөрсөн арван хоёр жилийн хугацаанд ээжийгээ хоёр ч удаа Японд аваачиж үзүүлсэн гэнэ.
Түүний сүмод элссэн түүх ч сонин. Багадаа тэрбээр биеэр том, хүнд жинтэй ч, хурдан шалмаг хөдөлгөөнтэй, уян хатан хүүхэд байсан гэдэг. Хавь ойрынхонд сонирхогдсон энэ байдал нь л түүний сүмод очих үүд хаалгыг нээж өгчээ. А.Михахановыг анх Японд аваачсан Буриадын бизнесмэн Зоригт Саханов энэ тухайгаа хожим нь ийн дурссан байдаг. “Манай буриадууд хар багаасаа л дээлээ урж өсдөг. 80-аад оны эхээр Зөвлөлтийн спортын сэтгүүлч Владимир Штайнбах хөрөнгөтний спортын үнэн нүүр царай марай гэсэн сэдэвтэй ном гаргасныг үзсэн юм. Ялагдашгүй аварга Китаноүмийн тухай тэндээс мэдэж их сонирхов. Гэхдээ тэр номд сүмочдийг сайлсан биш муулсан байлгүй яахав. Ядуучууд дүүрэн зулсан Токиогийн метронд баян тарган сүмочдын өнгөт плакат дүүрэн гэх мэт. 80-аад оны сүүлээр “Советский спорт” сэтгүүлд сүмогийн ертөнцөд хэрүүл дэгдсэн тухай гарлаа. Алдарт Конишики Мэргэжлийн сүмогийн холбооны шийдвэрийг эсэргүүцсэн тухай. Ялангуяа 270 кг жинтэй аваргын зургийг хараад жигтэйхэн гайхсанаа санаж байна. 1999 оны хавар Тамара Нагуслаева гэдэг сэтгүүлч хүүхэн Улаан-Үдийн нэг сонинд 15 настай мөртлөө 200 кг жинтэй Толя Михаханов хэмээх хүүгийн тухай бичсэн юм. Тийм лагс биетэй хүүхэд байж шпагат суудаг, мотоцикл гарамгай унадаг, хөл бөмбөг сайн тоглодог гэнэ. Ерөөсөө тэр хүүг Японд аваачиж сүмод оруулъя гэж шийдэв. Ингээд Буриадад очиж аав ээжтэй нь яриад хүүг Санкт-Петербургт аваачиж бөхийн сайн дасгалжуулагч олж урьдчилсан бэлтгэл хийлгэлээ. Токиод байдаг спортын чиглэлийн сайн танилуудтайгаа ярьж “Китаноүми аваргатай холбож өгөөч” гэсэн нь харин тун амархан бүтдэг юм байна. Китаноүмигийн багын найзууд нийлсэн 20-иод хүнтэй нийлж Кюүшюүд нисч хүрэв. Китаноүми тун сайхан угтаж, хувийн ресторануудынхаа нэгэнд нижгэр хүлээн авалт хийсэн юмдаг. Оросын анхны сүмоч ингэж Японы их сүмод хөл тавьсан юм даа”. З.Саханов мөн үүнээс гурван жилийн дараа Рохо, Хакүрозан нарыг сүмод элсүүлэхээр Японд аваачиж Китаноүми аваргатай уулзуулахад А.Михаханов их аваргад хувийн туслагчаар нь үйлчилж байсан тухай дурссан байдаг билээ. Өнгөрсөн жил гаргасан Эрхүү мужийн Гиннесийн номын зургаа дахь удаагийн хэвлэлд А.Михаханов тус мужийн хамгийн хүнд жинтэй хүн гэгдэн бичигдсэн юм.