УИХ-ын Төрийн байгуулалтын байнгын хороогоор УИХ-ын Сонгуулийн тухай хуулийн төслийн эцсийн хэлэлцүүлэгт бэлтгэж байна. Сонгуулийн тухай хуульд хэд хэдэн онцлох заалт тусгаж өгсний нэг нь авлига, албан тушаалын гэмт хэрэг үйлдсэн нь шүүхээр тогтоогдсон бол нэр дэвшихийг хориглоно гэсэн заалт юм. Уг заалтыг энэ сарын 18-ны өдрийн УИХ-ын ээлжит чуулганы анхны хэлэлцүүлгээр дэмжсэн. Гэвч Үндсэн хуулийн Цэцийн дүгнэлтийг зөрчиж байна гэсэн дүгнэлттэй холбогдох эсэхийг байнгын хороогоор хэлэлцэх бөгөөд дүгнэлтийг УИХ-ын гишүүн С.Бямбацогт танилцуулсан. Үүний дараа гишүүд асуулт асууж, санал хэлэх үеэр УИХ-ын гишүүн О.Баасанхүү АТГ-аас холбогдох албан тушаалтнуудыг тайлбар өгүүлэхээр дуудсан аж.

Энэ үеэр УИХ-ын гишүүн О.Баасанхүү: Эрүүгийн хуульд хуучин ялтайд тооцох хугацаа гэж байсан. Тодорхой эрүүгийн хэрэгт ялгаатай хугацаанд гэмт хэрэг үйлдвэл давтан хийсэн хэмээн ял нэмэгддэг байлаа.

Энэ дагуу Цэцэд гомдол гаргаж, дэлхийн хаана ч ялтайд тооцох хугацаа гэж байдаггүй юм байна гээд Эрүүгийн шинэ хуулиар байхгүй болгосон.

НҮБ-ын Авлигын эсрэг конвенцид албан тушаалтнуудын авлига, албан тушаалтны хэргийг Эрүүгийн хуулиас тусад нь авч үзээд чангатгах ёстой гэдэг. Удаа дараа ингэж шаардсан, хэлсэн. Цэцийн дүгнэлтийг үндэслээд ялаа эдэлж дууссан бол гишүүн бол гэх юм уу, яах ёстой юм бэ. Танай байгууллага ямар байр суурьтай байна вэ. Ял нь дууссан хүн ажлаа хийгээд явж болно.

Заавал нэр дэвшиж, гишүүн болж яах гээд байгаа юм бэ. Үүнийг ойлгохгүй байна 

АТГ-ын Мөрдөн шалгах хэлтсийн орлогч М.Даваатогтох: Авлигын хор хөнөө бол нийгэмд маш хор хөнөөлтэй. Төрийн албаны тухай хуулийн шинэчилсэн найруулгад төрийн жинхэнэ албан тушаалд тавих нийтлэг шаардлага, Эрүүгийн хуульд авлига, албан тушаалын хэрэг үйлдэж ял эдлээгүй байх гэж заасан. Төрийн жинхэнэ албан хаагчид ийм шаардлага тавьж байхад төрийн түшээ, гишүүнээр сонгогдох гэж байгаа хүн авлига, албан тушаалын гэмт хэргээр шийтгэгдээгүй байх ёстой гэсэн байр суурьтай байна. 

Уг саналтай холбогдуулан байнгын хорооны гишүүд багагүй маргасан. Ингээд "Авлига, албан тушаалын гэмт хэрэг үйлдсэн нь шүүхээр тогтоогдсон бол нэр дэвшихийг хориглоно" гэсэн заалт байнгын хорооны гишүүдэд таалагдаагүй учир байнгын хорооны 11 гишүүний олонхийн саналаар ийнхүү хасахаар боллоо. 

Төрийн байгуулалтын байнгын хорооны гишүүнээр 

УИХ-ын дарга, УИХ-ын гишүүн Г.Занданшатар

Д.Лүндээжанцан

Н.Амарзаяа

О.Баасанхүү

Ж.Батзандан

С.Бямбацогт

Б.Жавхлан

Ж.Мөнхбат

Б.Наранхүү

Л.Оюун-Эрдэнэ

О.Содбилэг

Д.Сумъяабазар

Д.Тогтохсүрэн

Д.Хаянхярваа

Н.Цэрэнбат

Н.Энхболд

М.Энхболд

Д.Эрдэнэбат

Ж.Эрдэнэбат