Цагдаагийн байгууллагаас ОХУ-ын иргэн А.В.Самохин гэх хүнийг гадаадаас Монгол Улсад их хэмжээний ам.доллар оруулж ирэн угаасан байж болзошгүй хэргээр шалгаж байна.

Тодруулбал, тэрбээр Кипр улсын хөрөнгө оруулалттай “Валестия” гэх компанийг 2011 онд  байгуулсан бөгөөд гадаад худалдаа, бизнесийн зөвлөгөө зөвшөөрөл авсан аж. Гэвч манай улсын арилжааны банкуудаар 2015-2019 оны хооронд 54 тэрбум төгрөгтэй тэнцэх хэмжээний валют хүлээн авч үүнийгээ оффшор бүсэд бүртгэлтэй Кипр, Беларусь зэрэг 10-аад улс руу шилжүүлж, 13 тэрбум төгрөгийн татвараас зайлсхийсэн байж болзошгүй үйлдлийг илрүүлсэн байна.

Дээрх иргэнд Монгол Улсын хилээр гарахыг хориглох хязгаарлалт тогтоосон байна. Эндээс үзвэл, гадаадын хөрөнгө оруулалттай аж ахуйн нэгжүүдийн цаана мөнгө угаах хууль бус үйлдэл бугшсан болзошгүй гэдгийг хууль хяналтын байгууллагаас сэжиглэж байгаа аж.