"Буудал, саун, фитнес, иога зэрэг бие бялдар хөгжүүлэх төвүүдийн үйл ажиллагааг нээсэн атлаа оюуныг хөгжүүлэх сургалтын төвүүдийн үйл ажиллагааг нээхгүй байх нь зүйд нийцэхгүй гэдгийг Сургалтын төвүүдийн төлөөлөл хэвлэлийн бага хурал хийж мэдэгдлээ. Сургалтын төвүүдийн зүгээс “Сургалтын төвүүд цөөн тооны сурагчдад хичээл заах бүрэн боломжтой. Суралцагчид IELT, TOFEL-ийн шалгалтад бэлтгэж, дэлхийн өндөр хөгжилтэй улс орны их, дээд сургуулиудад суралцаж ирсэн. Гэтэл сургалтын төвийн үйл ажиллагааг нээхгүй байгаагаас болж хүүхдүүд энэ боломжоо алдаж байна. Тиймээс сургалтын төвийн үйл ажиллагааг нэн яаралтай нээх хэрэгтэй" гэсэн юм.

Харин авто сургалтын төвийн төлөөллийн зүгээс “Монгол Улсад 300 гаруй жолооны сургалтын төвд 2000 гаруй хүн ажилладаг. Цар тахлаас болж ажилчдынхаа 40 гаруй хувийг алдсан. Жолооны үнэмлэхээ аваагүй жолооч нар хохирч байна. Бид танхимд биш цахим хэлбэрээр сургалтаа явуулах бүрэн боломжтой. Мөн жолоочийн эрх олгох, ангилал ахиулах сургалтыг энэ хэлбэрээр явуулах боломжтой. ХНХЯ-нд бид хүсэлт гаргасан. Энэ дагуу холбооноос хорио цээрийн үед ажиллах зөвлөмж гаргасан. Энэ зөвлөмжийн жолооны курсын багш нар дагаж ажиллах бүрэн боломжтой гэсэн. Гэтэл сургалтын төвийн үйл ажиллагааг ирэх есдүгээр сар хүртэл зогсооно гэсэн. Бид төрийн алба хаагчид биш. Орлогогүй иргэд яаж амьдралаа авч явах юм бэ. Бид чадлынхаа хэрээр ажиллаж татвараа төлдөг. Гэтэл төрөөс бидний үйл ажиллагааг боогдуулж байна. Тиймээс ямар нэг арга хэмжээ авна уу”.

“Эхлэл” компанийн захирал Ч.Батзаяа “Хувийн хэвшлийн нөхцөл байдал хүндэрч байна. Төрийн зүгээс эдийн засгийн нөхцөл байдлыг огт тоохгүй байна. Сонгууль дөхөж байгаа учир аль болох хооронд нь уулзуулахгүй байя гэсэн хардлага төрж байна. Биднийг ажилгүй сууж бай гээд орхисон. Гэтэл буудал, фитнесс, иогийн төвийг нээсэн. Эрүүл мэндэд хэрэгтэй байх. Гэхдээ оюун санаагаа хөгжүүлж байж улс эх орон хөгжинө. Уг нь дотооддоо халдвар гараагүй. Гэтэл сургалтын төвүүдийг алагчилж үзэх нь ямар учиртай юм бэ.

Саун нээх нь ямар учиртай юм бэ. Халуунд тэсвэртэй байж сур гэж байгаа юм уу. Иогийн төвийг нээсэн. Хадаасан дээр гишгиж сурах нь монголчуудад хэрэгтэй бололтой. Өнөөдрийг хүртэл бид дотоод нөөц бололцоогоор цалингаа тавьж, түрээсээ төлж байна. Бид эрх баригчдад удаа дараа хүсэлт тавьсан. Гэтэл манай асуудал биш гэдэг. Хэн нь биднийг хариуцаж байгаа нь мэдэгдэхгүй. Гаргасан шийдвэр нь амьдрал дээр хэрэгждэггүй. Кофе ууж байгаад шийдвэр гаргадаг уу. Судалгаа, шинжилгээтэй, амьдралтай шийдвэр гаргаж байгаач ээ.

Хувийн хэвшлүүд элгээрээ хэвтлээ. Хэн ч хааж, зогсоож, боож чадна. Харин бүтээн байгуулалтыг тэгж хийдэг эд биш”.

Харин хөгжмийн сургалтын төвийн төлөөлөл "Хөгжмийн сургалтад нэг цагт нэг л оюутан багштайгаа ажилладаг. Тэгвэл саунд нэг цагт хэдэн хүн орох бэ. Халуун, чийгтэй орчинд амны хаалт зүүсэн ч норно. 

Амралтын газар нээх нь зөв. Гэхдээ тоон дээр хяналт тавьж чадах уу. Сургалтын төвүүд оюутан бүртэйгээ гэрээ хийж, цагийг нь бүртгэдэг. Ингэхээр шийдвэр гаргагчдын шийдвэр амьдрал дээр хэрэгжих боломжгүй" гэв.