УИХ-ын Аюулгүй байдлын байнгын хорооны өнөөдрийн хуралдаанаар Зэвсэгт хүчний тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхээр хуралдлаа. Хуулийн төслийг боловсруулахдаа Монгол Улсын Ерөнхийлөгч Х.Баттулгатай санал солилцсон бөгөөд тэрбээр дэмжиж зөвшөөрсөн гэдгийг Батлан хамгаалалын сайд Н.Энхболд танилцуулсан юм.

Хэлэлцэж буй асуудалтай холбогдуулан гишүүд саналаа хэлсэн.

Б.Бат-Эрдэнэ: Хэсэгхэн хугацаанд ч гэсэн зэвсэгт хүчний чадварлаг залуустай хамтарч ажиллах боломж надад олдсон ч талархаж явдаг. Кибер аюулгүй байдлын талаар надад хэлэх юм алга. Нефть, төмөр замын бүтээн байгуулалтад зэвсэгт хүчин сайн ажиллаж байна. Эдийн засгийн хэмнэлт гаргаж чадаж байна. Гэхдээ тэнд ажиллаж байгаа цэргийн алба хаагчид хэр хэмжээний цалин авах юм бэ. Цаашлаад Зэвсэгт хүчний хөгжлийн сангийн нөөцийг арвижуулах боломж байна уу. Мөн монгол хүний уламжлал болох бөх, цэргийн албаар монгол залуусаа хамруулдаг байгаасай. Энэ ажилд зөвхөн хугацаат цэргийн алба гэлтгүй оюутан цэрэгтэй адил эсвэл өөр ямар хэлбэрээр хамруулах боломж байна вэ. Үүнд анхаарах хэрэгтэй байна. Боломж нь байвал олон улсын байгууллагаас өгсөн тусламж, дэмжлэгээс хуваарилдаг байх хэрэгтэй.

Т.Аюурсайхан: Хуулийн төслийг дэмжиж байна. Тагнуулын байгууллагын тухай хуульд төрийн болон онц чухал сүлжээ, харилцаа холбооны аюулгүй байдал хангах, цахим аюул, заналтай тэмцэх үүрэгтэй гэж заасан. Хууль хооронд чиг үүргийн давхцалгүй байх ёстой. Тиймээс ямар чиглэлийг нь тагнуул, юуг нь зэвсэгт хүчин хариуцах юм уу гэдгээ тодорхой болго.

Ингээд хуулийн төслийг хэлэлцэх эсэхэд санал хураасан. Санал хураалтад байнгын хорооны 19 гишүүнээс 12 нь оролцож, 66 хувийн саналаар дэмжигдсэн юм.

Хуулийн төслийн талаар Батлан хамгаалахын сайд Н.Энхболд "Сүүлийн жилүүдэд улсыг хөгжүүлэх бүтээн байгуулалтын ажлууд болох төмөр зам, авто зам, барилга байгууламж, газрын тосны үйлдвэрийн дэд бүтэц зэрэг томоохон төсөл, хөтөлбөрт Зэвсэгт хүчний барилга, инженерийн анги, байгууллагуудыг татан оролцуулж амжилттай хэрэгжүүлж байна. Тухайлбал, Монголын газрын тос боловсруулах үйлдвэрийн дэд бүтцийн хүнд даацын автозамын төсөл болон “Халх гол" сумын шинэчлэлийн ажлуудыг хэрэгжүүлж дуусгалаа. Мөн Тавантолгой- Зүүнбаян чиглэлийн 414.6 километрийн төмөр замын суурь бүтэц угсрах, доод бүтэц барих бүтээн байгуулалтын ажлыг Зэвсэгт хүчний бие бүрэлдэхүүн хариуцан ажиллаж байна.

Монгол Улсын Зэвсэгт хүчний бие бүрэлдэхүүнийг дээрх бүтээн байгуулалтын ажилд оролцуулахдаа үндсэн үүргээ биелүүлэх, бэлэн байдлыг алдагдуулахгүйгээр цэргийн барилга, инженерийн ангиудыг цэргийн захиргааны удирдлагаар шууд ханган, бие даасан төрлийн цэргийн хэмжээнд үйл ажиллагаа явуулах боломжийг хангах үүднээс төрөл, мэргэжлийн цэрэгт хамаардаг барилга, инженерийн ангийн статусыг нэмэгдүүлэн, гүйцэтгэх чиг үүргийг хуулиар нарийвчлан тодорхойлж, түүний харьцангуй бие даасан удирдлагатай, төвлөрсөн нэгдмэл байдлыг хангах, орчин үед цахим кибер хандлага хурдтай өсөн нэмэгдэж, мэдээллийн аюулгүй байдалд заналхийлэх болсонтой холбогдуулан Зэвсэгт хүчинд кибер аюулгүй байдлыг хангах эрх зүйн үндсийг хуулиар бий болгох зэрэг асуудлыг нэн даруй шийдвэрлэх, хэрэгцээ, шаардлага бий болсон гэж төсөл санаачлагчид үзсэн" талаар танилцуулсан юм.