УИХ-ын үдээс хойшхи чуулганаар Хөгжлийн банкнаас олгох ноолуур бэлтгэн нийлүүлэхэд зарцуулах 300 тэрбум төгрөгийн хөнгөлөлттэй зээлийн талаар хэлэлцэж байна. 

Ё.Баатарбилэг: 100 мянгаар ноолуур авчихлаа. Гэтэл тухайн ААН зээлээ эргэн төлөхгүй байх нөхцөл үүсвэл яах вэ. Чөлөөт зах зээлийн үед үнэ тогтоох асуудал байж болдог юм уу. Хэрэв ААН-үүд алданги хүлээвэл хэн хариуцах вэ?.

Ч.Улаан: 300 тэрбум төгрөгөөр бэлтгэх ноолуурыг аймаг бүрт хувь тэнцүүлж хувааж болоогүй юм уу гэж байна. Ингэж хэрэгжүүлэх боломжгүй. ААН-үүд дэлхийн зах зээлийн үнэ ханшийг судалж байгаад зээл авсан бол эрсдэлээ тооцох ёстой. 2240 тонн ноолуур бэлтгэх гэрээ хийсэн ААН-ийн бүтцийг авч үзвэл, Архангай аймагт дөрөв, Сүхбаатар аймагт дөрөв, Булган аймагт гурав, Өвөрхангай аймагт гурав гэх зэргээр компаниуд эрх авсан, гэрээгээ хийгээд ажиллаж байна.

Ноолуур бэлтгэлийн ажилд гарах үйл ажиллагаа зам хаасантай холбогдуулан жаахан саатлаа. Зарласан бодлогын гэрээнд заагдсан үнээр ноолуур бэлтгэж чадахгүй алданги үүсвэл хэн хариуцах вэ гэлээ. Ийм байдал үүсэхгүй гэж болов уу. Ихэнх ААН гадаад түнштэйгээ гэрээгээ хийж энэ ажил руу орсон байж таараа. Тиймээс хариуцлага энэ тэрийн асуудал гарахгүй байх. Бэлтгэн нийлүүлэгчдийг шахах эрх байхгүй. Учир нь эрсдэлээ тэд хариуцаж байгаа. Дэлхийн зах зээлийн үнэтэй хариуцвал нугараад яваад өгнө. Нөгөөтээгүүр, малчдын хөдөлмөрийн үнэ цэнийг бодохгүй бол болохгүй. Нэг малчин бүтэн жил өсгөн тэжээсэн ноолуураасаа 20 мянган төгрөг олох нь эрсдэлтэй. Тиймээс бодит эрсдэлийг тооцох ёстой. Зүүн аймгуудад борлогдсон ноолуурын үнэтэй харьцуулахад гурав дахин бага үнэ. Зах зээлийг зөв гольдрилд нь оруулах нь зөв гэж бодож байна.

Б.Лхам