Нийслэлийн прокурорын газрын хяналтын прокурор Д.Эрдэнэсувд сүүлийн үед олны анхаарлын төвд байгаа зарим хэргийн мэдээллийг өгч, сэтгүүлчдийн асуултад хариуллаа. 

-Ерөнхий сайд асан М.Энхсайханыг цагдан хорих, таслан сэргийлэх арга хэмжээ авсан нь үг хэлэх, хэвлэн нийтлэх эрх чөлөөнд халдлаа гэх шүүмжлэлд дагууллаа. Үүнд тайлбар өгөхгүй юу?

-Үндсэн хуульд заасны дагуу хүний хэвлэн нийтлэх, үг хэлэх эрх чөлөө нээлттэй. Яллагдагч хүний хувьд Эрүүгийн хэргийг хянан шийдвэрлэх тухай хуулийн 7.9-д заасны дагуу тодорхой үүргийг хүлээдэг. Яллагдагч мөрдөн байцаалтын ажиллагаа дууссаны дараа хавтаст хэрэгтэй танилцаж, эрхээ эдлээд нотлох баримтуудыг хуулбарлан авсан байдаг. 

Түүний хувьд гэм буруугийн асуудлыг эцэслэн шийдвэрлээгүй байхад нотлох баримт болон гэрчүүдийн мэдүүлэг, тодорхой шийдвэрийг хэвлэл мэдээллийн хэрэгслээр тараасан. Уг нь мөрдөн байцаалтын нууцыг задруулахгүй байх баталгаа авч гарын үсэг зурсан хүн. Гэтэл ийм үйлдэл хийсэн. Прокуророос шүүх хуралдааны явцад мөрдөн байцаалтын ажиллагааны нууцыг задруулсан, шүүхэд нөлөөлөх гэсэн энэ байдалд нь хууль зүйн дүгнэлт хийхийг хүссэн. Энэ дагуу шүүхээс хууль зүйн дүгнэлт хийж, цагдан хорих, таслан сэргийлэх арга хэмжээ авах шийдвэр гаргасан.

-Яллагдагчийн зүгээс хэд хэдэн хүнээс гэрчээр мэдүүлэг авах хүсэлт гаргасан байсан?

-Гэрч нар ирээгүй учир шүүх хурал хойшилсон. Би шүүх хуралдаанд оролцоогүй учир дэлгэрэнгүй мэдээлэл хийх боломжгүй.

-М.Энхсайханыг цагдан хорих явцад эрүүдэн шүүсэн байж болзошгүй тухай мэдээлэл гарсан. Жишээлбэл, хотын дарга асан Э.Бат-Үүл түүнийг 10 цаг босоогоор нь байлгасан зэргийг өөрийн цахим хуудсаар мэдэгдсэн. Ийм нөхцөл байдал тогтоогдсон уу?

-Нийслэлийн прокурорын газраас хорих 461 дүгээр ангид тогтмол хянагдаж байгаа яллагдагч нартай уулзаж, санал хүсэлтийг сонсдог. Дөрөвдүгээр сарын 24-ний өдөр М.Энхсайхантай уулзсан. Энэ үеэр санал гомдол байхгүй, хоолоо сайн идэж байна гэж хэлсэн. Тэгэхээр энэ нь ташаа мэдээлэл.

-Энэ хэрэгт өөр хүнийг яллагдагчаар татах үндэслэл бий юү?

-Мөрдөн шалгах ажиллагаа дуусч шүүхэд шилжсэн. Шүүхээс шүүн таслах ажиллагааны явцад шаардлагатай арга хэмжээ авах байх. 

-Х.Бат-Ялалт өлсгөлөн зарлаад байсан. Цагдан хорих, таслан сэргийлэх арга хэмжээг ямар үндэслэлээр цуцалсан бэ?

-Иргэн Л.Эрдэнэчимэгээс гаргасан гомдлын дагуу 2019 оны дөрөвдүгээр сард Х.Бат-Ялалтад хэрэг бүртгэлтийн хэрэг нээсэн. Хэрэг бүртгэлтийн хэрэг нээсэн явцад түүнийг удаа дараа дуудсан. 2020 оны гуравдугаар сард л гэхэд прокуророос гурван удаа дуудан ирүүлэх хуудас өгсөн боловч хүндэтгэн үзэх шалтгаангүйгээр ирээгүй. Тиймээс таслан сэргийлэх арга хэмжээний саналыг прокуророос шүүхэд хүргүүлсэн. Шүүхэд хүсэлтийг хангаж шийдвэрлэсэн.  

Шүүхийн урьдчилсан хэлэлцүүлэг боллоо. Энэ үеэр Х.Бат-Ялалт нь шүүх, прокурор, мөрдөгчийн дуудсан цагт саадгүй ирэх хүсэлтээ өөрийн биеэр тавьсан тул түүний таслан сэргийлэх арга хэмжээг өөрчилсөн.

-Өлсгөлөн зарласан нь үнэн юм уу?

-Тэр талаарх мэдээлэл надад алга. Өмнө нь хэлсэнчлэн прокуророос тогтмол уулзаж, санал хүсэлтийг нь сонсож байсан. Ганц М.Энхсайхан, Х.Бат-Ялалт биш хорих 461 дүгээр ангид хоригдож байгаа бүх яллагдагч нартай прокурор хуулиар уулзах ёстой. Энэ ажиллагаа хийгдсэн.

Г.Маргад