Монгол Улсын 32 дахь Ерөнхий сайд Л.Оюун-Эрдэнийн тэргүүлсэн “Шинэ үеийн” гэх тодотголтой Засгийн газрын танхимын шинэ гишүүдийн нэрс тодроход тоон дотор үсэг цохиж явна гэгчээр хэний ч төсөөлөөгүй нэгэн орж ирсэн нь Ч.Номин байлаа. Түүнийг “Монгол телевиз”-ийн захирал, Монголын толгой баян “Гацуурт”-ын Л.Чинбатын охин гэдгээр нь хүмүүс мэдэх ч сайдын албан тушаалд томилогдчих юм гэж хэн санах билээ.

Мордохын хазгай гэгчээр түүний үйл хөдлөл анхнаасаа л хэн бүхэнд таалагдаагүй. УИХ-ын чуулганы танхимд биеэ авч яваа байдал, үл хүндэтгэл, гишүүдийн асуултад бохь зажлан, хоёр гараа халаасандаа шургуулчихаад хээвнэг хариулж зогсоо   зэргээс түүний хэн бэ гэдгийг төвөггүйхэн дүгнэж болохоор байсан.

Төрийн албанд нэг ч өдөр ажиллаж үзээгүй, төрийн албаны жаргал зовлон, хатуу ширүүнийг амсаагүй хэмээн Ч.Номин сайдыг шүүмжлэгсэд олон байсан. Энэ нь ч ортой болж, тэрбээр Соёлын яамаа хувийн салбараа гэж үзэн, ажилтнууддаа дэндүү дээрэнгүй өнгө аясаар ханддаг тухай шүүмжлэл байнга чих дэлсдэг.

Монгол Улсын Ерөнхий сайд Л.Оюун-Эрдэнэ ердөө хоёрхон хоногийн өмнө буюу тавдугаар сарын 10-нд Засгийн газрынхаа 100 хоногийн ажлаа тайлагнасан. Энэ үеэр танхимынх нь сайд нар 100 хоногт хийж бүтээсэн, хийхээр зорьсон олон ажлаа дэлгэрэнгүй танилцуулж, хэлэх үгтэй байцгаав.

Харин Ч.Номин хамгийн залуу сайдын хувьд бусдын нүдийг хужирлан  энүүгээр, тэрүүгээр ч нэг гүйн, олны хараа булаахаас өөрийг хийсэнгүй. Түүнд тайлагнах зүйл ч байгаагүй бололтой.

Шинэ тутам байгуулсан Соёлын яам, шинэ сайдад соёл, урлагийнхан ихээхэн итгэл найдвар тавьж байв. Бие даасан яамтай, залуу сайдтай боллоо. Хэсэгтээ л сөхрөөд байсан соёл, урлагийн салбар сэвхийгээд босоод ирнэ хэмээн олзуураж байв. Гэтэл их санасан газар есөн шөнө хоосон хонохын үлгэрээр Ч.Номин сайд өнгөрсөн 100 хоногт салбарынхаа төлөө юу ч хийсэнгүй.

Харин хийхийг завдсан, санаачилсан зарим нэг ажил нь олны доог тохуу болоод дууссан. Тухайлбал, 18-35 насны 5000 залууг “Ажиллах хүчний сургалт” гэх нэр сарын сургалтад суусных нь төлөө нэг сая төгрөгийн тэтгэлэг олгох хөтөлбөрийг зарласан. Харин бүгдийг нэгэн жигд хувцсаар “гоёх” ажлыг  Ч.Номин сайд даан авч зардлыг Соёлын яамнаас гаргана гэж байв. Харин эцэстээ энэхүү хөтөлбөрийг хойшлуулахаар болсон билээ. Дараагийнх нь гуравдугаар сарын 26-нд Соёлын өвийн үндэсний төвийн шинэ барилгын нээлтийн туузын хайчилсан явдал байлаа. Ердөө ийм хоёр үйл явдал тэмдэглэгдэн үлджээ.

Телевизийн салбарт нэлээдгүй хугацаанд ажилласан залуу хүний хувьд энэ салбартаа хийхээр төлөвлөсөн, бодож санасан шинэлэг зүйл байна уу гэсэн гишүүдийн асуултад   Ч.Номин сайд “Энэ талаар зургаан сарын дараа хариулъя” хэмээн хээвнэг зогсож харагдсан. Харин одоо таны амласан цаг хугацааны тал нь урсаад өнгөрчихлөө. Үлдсэн сард хийсэн ажилтай, хэлэх үгтэй суугаарай даа, сайд аа. Үгүй бол Л.Оюун-Эрдэнийн танхимаас “сугалах” эн тэргүүний сайд таныг гэх юм билээ шүү.

У.Тэргэл