Төр, түмнийхээ төлөө шударга ажиллах тангараг өргөсөн парламентын гишүүд жил орчмын хугацаанд ажиллалаа. Энэ удаагийн парламент дөрвөн намын төлөөллөөс бүрдсэн ч МАХН-аас сонгогдсон гишүүн АН-д нэгдсэнээр энэ тоо гурав болсон юм.

Өмнө нь УИХ 50-иас доошгүй удаа хуралддаг байсныг Үндсэн хуулийн өөрчлөлтөөр 75-иас доошгүй хоног болгон өөрчилсөн. Үүнтэй холбогдуулан өнгөрөгч намрын чуулганаар 82 удаагийн чуулганы нэгдсэн хуралдаанаар  нийт 87 хууль, 44 тогтоолыг хэлэлцэж, баталжээ.

Энэ парламентад өмнө нь УИХ-ын гишүүнээр ажиллаж байгаагүй шинээр сонгогдсон 20 шахам гишүүн бий. Шинэхэн гишүүдийн хувьд эхний улирлын чуулганы хуралдааны хугацаа бол “хөл”-д, дараа нь “хэл”-д орох арга зүйгээ олох үе нь.

Гэвч бүхэл бүтэн намрын чуулган завсарлаад хаврын чуулгандаа орж явахад хэлд ч ороогүй, олонд танигдаагүй, өмнө нь аймгийн Засаг даргын албыг хашиж байсан хэд хэдэн гишүүн байна. Тэднийг иргэд парламентын “хэлгүй” гишүүд гэж хочилдог юм билээ. Тухайлбал, Төв аймгийн 14 дүгээр тойрогт МАН-аас нэр дэвшиж, ялалт байгуулсан Ж.Батжаргал. Түүнийг аймгийнхан нь л манай “Засаг” байсан даа гэж л мэдэх. Чуулганы хуралдаанд барагтай үг унагадаггүй болохоор олонд танигдаагүй гишүүдийн нэг нь гэж хэлж болно. Дараагийнх нь Баянзүрх дүүргээс сонгогдсон Э.Бат-Амгалан, Орхон аймгийн Засаг даргаар ажиллаж байсан Д.Батлут, Өвөрхангай аймгийн Засаг дарга Г.Ганболд, Дорноговь аймгийн Засаг дарга Т.Энхтүвшин нар байна. Мөн мэддэг нэг нь бөх байсан  гэхээс одоо гишүүнээр сонгогдсоныг нь ч мэдээгүй Ц.Цэрэнпунцаг гарьд байна. 

Парламент бол “хэлгүй” нөхдийн дамжин өнгөрөх, тэднийг сургадаг газар биш л дээ. Иргэд сонгогчдынхоо өгсөн итгэлийг бодсон ч тэр, эрх ашгийг нь төлөөлсөн шиг төлөөлж, “амь” орох хэрэгтэй энэ мэт гишүүн олон байна.

А.Сүх