Цаана чинь төрийн албан хаагчдын гэр бүлийнх нь хүний цахим хуудсанд нийтэлсэн мэдээллийг хянадаг болох нь гэж дуулав уу. Өчигдрийн дуулиантай л сэдвийн нэг байлаа. Гэр бүлийг нь хүртэл хянаж буруутвал “жавтий” хүртээж хариуцлага тооцдог болох юм байх.

Тодруулбал, Төрийн албаны зөвлөлөөс төрийн албан хаагчдын хувийн хэрэг, анкетыг шинэчилж байгаатай холбоотойгоор төрийн албан хаагчдын гэр бүл, үр хүүхэд төрөл садангийн хүмүүсийнх нь овог нэр, регистрийн дугаар, ажлын газрын хаягаас гадна тэдгээр хүмүүсийнх нь цахим шуудан, олон нийтийн сүлжээн дэх хаяг зэрэг хэт хувийн мэдээллийг нь цахим анкетын заавал бөглөх хэсэгт оруулахыг шаарджээ. Бүр хаана хэдэн төгрөгний зээлтэйг нь будалж, хувийн мэдээллүүдийг нь цуглуулж эхэлсэн юм байх. Ийм мэдээлэл өчигдрөөс эхлэн цахим орчинд түгээд эхэлсэн юм.

Хүний эрх, эрх чөлөө, үг хэлэх, хэвлэн нийтлэх эрх нээлттэй гэж Үндсэн хуульдаа тунхагласан энэ заалт яах болж байна. Бас хувь хүний нууцыг хуулиар хамгаалдаг. Энэ эрхэд нь хүртэл халдах юм гэж үү.

Эрх мэдэлтнүүд болж л өгвөл эрх чөлөөг нь хязгаарлах, боомилох хууль санаачилж, бодлого боловсруулах гэж улайрах юм. Өмнө нь хүртэл Хууль зүй, дотоод хэргийн сайд Х.Нямбаатар Эрүүгийн хуульд нэмэлт, өөрчлөлт оруулах хуулийн төсөлд 13.14 дэх “худал мэдээлэл тараах” заалтыг өөрчилж, хэвлэл мэдээллийн төдийгүй нийгмийн сүлжээнд иргэний үзэл бодол, байр сууриа илэрхийлэх эрхийг бүхий л талаар хянан цагдах, хязгаарлан боомилох хуулийн төсөл оруулж ирж нэг хэсэг л шуугисан. Одоо Төрийн албаны зөвлөл нь төрийн алба хаагчдынхаа хувийн хэрэг, анкетыг шинэчлэх нэрийдлээр хувийн нууцад нь халдах гэж оролдож байна. Бид хууль, дүрэмтэй улсад амьдарч байгааг сануулах нь зөв байх.

Б.Лхам