Монгол Улсын Ерөнхийлөгчийн сонгуулийн санал хураах өдөр болоход хоёрхон хоног үлдлээ. Энэ удаагийн сонгуульд нэр дэвшигчид нийслэл, орон нутагт сурталчилгаагаа үргэлжлүүлж байсан ч коронавирусний халдварын улмаас цахимаар хийхээр болсон билээ. Учир нь, ХҮН-аас нэр дэвшигч Д.Энхбат эхнэр, эмчийн хамт халдвар авсны улмаас эмчлүүлж байгаа юм. Тэрбээр вакцины эхний тундаа хамрагдсан байсан бөгөөд хоёрдахиа хойшлуулсаар ийн эрсдэлд орсон байна. Энэ нь нийгмийг бухимдуулж, хувь хүний хариуцлага, УОК—ын шийдвэрийн хэрэгжилт хаа байна хэмээн шүүмжлэлд өртсөн. Удалгүй МАН-ын Ерөнхий нарийн бичгийн дарга Д.Амарбаясгалан мэдэгдэл хийн, тус намаас нэр дэвшигч У.Хүрэлсүх цахимаар болон хэвлэл мэдээллийн хэрэгслээр сурталчилгаагаа үргэлжлүүлэх болсноо зарласан юм. Энэ удаагийн Монгол Улсын Ерөнхийлөгчийн сонгуулийн сурталчилгаа нам гүмхэн, даруухан нэг үгээр уйтгартай гэж хэлж болохоор. Нөгөөтэйгүүр, нэр дэвшигчдийн хөтөлбөр өнөөдрийг хүртэл айл өрхийн дийлэнхэд хүрээгүй нь чамлалттай. Мөн сонгуулийн санал хураах өдөр сонгогчдын ирц ямар байх вэ гэдэг асуудал одооноос нэр дэвшигчдийн сэтгэлийг зовоох болжээ. Өмнөх прогнозыг харвал, жилээс жилээс буурсаар ирсэн байна. Тухайлбал,
-1993 он- АН П.Очирбат 57,78 хувь
-1997 он-МАН/МАХН Н.Багабанди 60,8 хувь
-2001 он- МАН/МАХН Н.Багабанди 58,13 хувь
-2005 он- МАН/МАХН Н.Энхбаяр 53,44 хувь
-2009 он- АН Ц.Элбэгдорж 51,21 хувь
-2013 он АН Ц.Элбэгдорж 50,23 хувь
-2017 он- АН Х.Баттулга 50,61 хувийн ирцтэй байжээ. Үүнээс харахад сонгууль бүрээр сонгогчдын ирц, идэвх буурч буйг харж болно.
Харин энэ жилийн хувьд ч давтагдаж болзошгүй дүр зураг харагдаж байгаа юм. Нөгөөтэйгүүр, цагаан сонголтыг дэмжсэн сонгогчид санал хураах өдөр ойртох тусам нэмэгдсээр. Ямартай ч, монголчууд зургаадугаар сарын 9-ний өдөр Монгол Улсын зургаа дахь Ерөнхийлөгчөө сонгоно. Энэ нь Монгол Улсын Ерөнхийлөгчөөр анх удаа зургаан жил ажиллах, мөн Ардын хувьсгалын түүхт 100 жилийн ойн баяраар Төрийн тэргүүнээр сонгогдсон гэх ховорхон хувь тохиолын эзэн болох юм.
У.Тэргэл
