Монгол улсын жолоодох эрхийн үнэмлэхтэй, жолоочийн бүртгэл мэдээллийн санд бүртгэлтэй жолоочид жолоочийн зөрчлийн онооны журам үйлчилдэг. Хууль зүй, дотоод хэргийн сайдын 2018 оны А/142 дугаар тушаалаар “Тээврийн хэрэгсэл жолоодох эрх дуусгавар болох, тээврийн хэрэгсэл жолоодох эрх сэргээх журам” батлагдаж хэрэгжиж байгаа. Үүний дагуу Төрийн бус байгууллага тухайн тээврийн хэрэгсэл жолоодох эрхээ хасуулсан этгээдэд "Хууль эрх зүй, замын хөдөлгөөний аюулгүй байдлын дүрэм, сэтгэл зүй" гэсэн гурван төрлийн зургаан цагийн хичээлийг зааж, холбогдох мэдээллийг Цагдаагийн ерөнхий газрын Бүртгэл хяналтын төвд хүргүүлснээр ажлын гурав хоногт тээврийн хэрэгсэл жолоодох эрхээ сэргээх боломжтой. Иймд дараах материалыг бүрдүүлэн аль нэг ТББ-ын сургалтанд хамрагдана. Архи согтууруулах ундааны зүйлс хэрэглэсэн үедээ тээврийн хэрэгсэл жолоодсон эсхүл осол аваар гаргасны улмаас тээврийн хэрэгсэл жолоодох эрхээ хасуулсан бол:
-ТҮЦ машинаас Жолоочийн эрх сэргээх лавлагаа, эрхийн лавлагаа авна.
-Аль ч Дүүргийн эрүүл мэндийн төвд хандаж тээврийн хэрэгсэл жолоодоход эрүүл мэндийн хувьд тэнцэхийг нотолсон эрүүл мэндийн хуудас бөглүүлсэн байна.
Замын хөдөлгөөний аюулгүй байдлын тухай хуулийн 18 дугаар зүйлд зааснаар дараах тохиолдолд тээврийн хэрэгсэл жолоодох эрх дуусгавар болно:
18.1.1.жолоодох эрхийн үнэмлэхийн хүчинтэй байх хугацаа дууссан;
18.1.2.жолооч тухайн ангиллын тээврийн хэрэгсэл жолоодоход эрүүл мэндийн хувьд тэнцэхгүй нь эрүүл мэндийн байгууллагын дүгнэлтээр тогтоогдсон;
18.1.3.зөрчлийн оноо тогтоосон хязгаарт хүрсэн;
18.1.4.тээврийн хэрэгсэл жолоодох эрхийг холбогдох хуульд заасны дагуу хассан.
18.2.Жолоодох эрхийн үнэмлэх хүчингүй болсон тохиолдолд тухайн иргэний олон улсын жолоодох эрхийн үнэмлэхийг хүчингүйд тооцно.
18.3.Дараах тохиолдолд тээврийн хэрэгсэл жолоодох эрхийг сэргээнэ:
18.3.1.жолоодох эрхийн үнэмлэхийг зохих журмын дагуу сунгуулсан;
18.3.2.жолооч тухайн ангиллын тээврийн хэрэгсэл жолоодоход эрүүл мэндийн хувьд тэнцэх нь эрүүл мэндийн байгууллагын дүгнэлтээр тогтоогдсон;
18.3.3.тээврийн хэрэгслийн жолоодох эрхийг хассан хугацаа дуусгавар болсон.
Т.Мөнхжаргал
