Цагдаагийн Ерөнхий газар, Эрүүл мэндийн яам хамтран зохион байгуулж буй “Аажуу явбал аяндаа хүрнэ” аяны нээлт өнөөдөр боллоо. Энэхүү аян хөдөө орон нутаг болон нийслэлд гарч буй зам тээврийн осолоос урьдчилан сэргийлэх заавар зөвлөмж өгөх зорилготой юм. Аяны талаар Тээврийн цагдаагийн албаны ахлах зохицуулагч Г.Отгонтамир мэдээлэл өглөө. 

Тэрбээр “Сүүлийн арван жилд 5000 орчим хүн зам тээврийн ослоор амь насаа алдсан харамсалтай хэрэг гарсан. Осол бүрийн цаана тэдний гэр бүл сэтгэл санаа болон эд хөрөнгөөр хохироод үлддэг. Орон нутгийн замд гарч буй ослын хамгийн том шалтгаан бол хурд хэтрүүлэх явдал. Нийт ослын 85 хувь буюу дийлэнхийг суудлын автомашины осол эзэлж байна. Зам тээврийн хөдөлгөөнд оролцож байгаа хүмүүс хөдөө орон нутагт явахдаа хурд хэтрүүлэх, хамгаалах бүс зүүгээгүйн улмаас онхолдох, мөргөлдөх зэрэг осол гардаг. Үүнээс болж бага насны хүүхэд гэлтгүй том хүн урд талын цонхоор шидэгддэх явдал гарсаар байна. 

Энэ жилийн Үндэсний их баяр наадамтай зэрэгцэж 7-8 аймгийн ойн баяр, 30 гаруй ЕБС-ийн ойн арга хэмжээ давхцаж байгаа. Иймд орон нутгийг чиглэсэн хөдөлгөөний эрчим нэмэгддэг.  Энэ үед иргэд хэрхэн аюулгүй байдлаа хангах тал дээр анхаарал хандуулах хэрэгтэй. Хамгийн түрүүнд автомашины бүрэн бүтэн байдал техник, тохиргоо заавал хийсэн байх шаардлагатай. Техникийн бүрэн бүтэн байдал алдагдсан тохиолдолд суудлын автомашин 60 км цагаас дээш хурдтай явахад жолоодлого алдах эрсдэлтэй байдаг. Мөн жолоочоос гадна хамт явж байгаа хүмүүс хариуцлагатай байж жолоочийн анхаарлыг сарниулахгүй байх, жолоочийн дэргэд унтахгүй явах хэрэгтэй” гэв.

Д.Бат-Эрдэнэ