Энэтхэгийн Ченнай хотод болсон дэлхийн шатрын олимпиадад амжилттай оролцсон баг тамирчдыг Биеийн тамир, спортын хороо хүлээн авч хүндэтгэл үзүүллээ. Энэ үеэр Биеийн тамир спортын улсын хорооны дарга Д.Жаргалсайхан үг хэллээ.

Тэрбээр "Манай улс шатрын шигшээ багтай. Үүнийг үргэлжлүүлж ажиллах нь зүйтэй гэж бодож байгаа. Энэ жилийн хувьд төсвийн хэмнэлтийн хуулийн дагуу зардал мөнгө тааруу байна. Ирэх жилээс сайжрах байх. Мөн бид Сангийн яам дээр Биеийн тамир, спортын байгууллага, шигшээ багийн төсвийг хамгаалахаар ажиллаж байна. Тиймээс цаашид шатрын шигшээ баг өргөжих, олон улсын тэмцээнд оролцох, бэлтгэл сургуулилт хийх нөхцөл бололцоо бүрдэнэ гэж үзэж байна. Миний бие шатар сайн тоглохгүй ч шатрын спортыг дэмжих ёстой гэж боддог.

Энэ удаагийн шатрын олимпиадад дөрөвдүгээр ширээнд тоглосон тамирчин алтан медаль хүртлээ. Их мастер, ОУ-ын мастерын болзол хангалаа. Зэрэгцэн тоглож буй тамирчидтайгаа тоглож, түрүүлж байна гэдэг бол том амжилт. Манай баг тамирчид маш сайхан амжилт үзүүллээ.

МУ-ын тамирчид олон улсын тэмцээнд оролцохдоо буюу шатрын Их мастер болсон хүнд 30 сая төгрөг өгнө гэдэг санаар гаргаж байлаа. Азийн наадмын шагнал 30 сая төгрөг байдаг. Их мастер болсон хүнд урамшуулал, шагнал тавьж өгснөөр Их мастерын болзол хангадаг шатарчдын тоо огцом өгссөн. Энэ нь өнөөдрийн тэмцээнд ч мөн нөлөөлж байгаа. Удахгүй Засгийн газрын хуралдаанаар шагналын асуудал шийдэгдэнэ" гэв.

Д.Батчулуун