Дуурийн дуулаач Э.Амартүвшин Монгол Улсын Ардын жүжигчин цол тэмдгээр энгэрээ мялаалаа. Энэ үеэр түүний баярын сэтгэгдлийг сонслоо.

Тэрбээр "Өнөөдөр бол миний амьдралд хэзээ ч мартагдахааргүй сайхан өдөр болж байна. Монгол Улсын ардын жүжигчин гэх нэр хүндтэй сайхан шагналыг хүртлээ. Багахан хөдөлмөрснийг минь, эх орныхоо нэрийг Олон улсад гаргасныг минь үнэлж өнөөдөр энэ шагналыг олголоо гэж бодож байна. Аав ээж, гэр бүл, намайг таньдаг бүх хүнд баярлаж, талархаж буйгаа хэлмээр байна.

Би багаасаа дуулах дуртай хүүхэд байсан учир эргэж буцалтгүй дуучин болохоор шийдээд Соёл Урлагийн Их сургуульд орсон. Олон сайхан багш нараас суралцаж, дуурь сонгодог урлагийн амт шимтэд ороод өдийг хүртэл явж байна. Зорьсон, мөрөөдсөн зүйлсийнхээ хойноос явсны үр дүн өнөөдөр гарч энэ сайхан шагналыг олгож байгаа гэж ойлгож байна. Цаашид энэ нэр хүндтэй шагналыг дааж, олон улсад улсынхаа нэрийг гаргахын төлөө хичээнэ.

Миний уралдааны нас дууссан. Уралдаан тодорхой насны хязгаартай байдаг. Олон улсын чансаатай бүх л том театруудад дуулсан. Дуулж байгаа. Хоёроос гурван жилийн төлөвлөгөөтэй дууриа дуулаад явж байна” гэв.

Дашрамд, Дэлхийн шилдэг баритон, Соёлын элч дуучин Э.Амартүвшинд 2021 онд Ардын жүжигчин цол олгосон юм. 25 насандаа Монгол Улсын Гавьяат жүжигчин цолыг гуйж биш гуядаж авч байсан тэрбээр өнгөрсөн хугацаанд дэлхийн нэр хүндтэй театруудад тоглолтоо хийж, дэлхийн шилдэг баритон гэдгээ баталсаар ирсэн юм.

Э.Амартүвшин олон улсын дуурийн найм дахь удаагийн "Дуурийн од" буюу дуурийн "Оскар" шагнал хүртэж, Дубай хотноо гардан авч байсан.

Мөн өмнө нь П.И.Чайковскийн нэрэмжит Олон улсын дуурийн дуучдын уралдааны дэд байр, 2012 оны Пласидо Домингогийн нэрэмжит уралдааны "Гран при", Английн ВВС агентлагийн “Cardiff Singer of the World 2015" уралдааны үзэгчдийн нэрэмжит шагнал, Солонгосын нийслэл Сөүлд болсон олон улсын тэмцээний гуравдугаар байрын шагнал тус тус хүртэж байсан билээ.

Д.Батчулуун