МУИС-ийн 80 дахь хичээлийн шинэ жилийн нээлт боллоо. Нээлтийн үгийг МУИС-ийн захирал, доктор Б.Очирхуяг үг хэлж, мэндчилгээ дэвшүүллээ.  

Тэрбээр "Эрдэмтэн багш, оюутан та бүхэнд МУИС-ийн 80 дахь хичээлийн шинэ жилийн баярын мэндийг хүргэе. Мөн энэ мөчид МУИС-ийг сонгон элсэн суралцаж байгаа шинэ элсэгчид та бүхэнд баяр хүргэж, сурлагын өндөр амжилт хүсье. Мөн эцэг эхчүүд та бүхэнд сургуулийн нэрийн өмнөөс талархал илэрхийлье. МУИС нь дээд боловсролтой мэргэжилтэн бэлтгэх эрдмийн их үүргээ нэр төртэй биелүүлж ирсэн. 

Бид өнгөрсөн хичээлийн жил 36 тэтгэлгийн эх үүсвэрээр 1,042 шилдэг оюутанд 1.2 тэрбум төгрөгийн тэтгэлэг гардуулсан. 

Энэ намрын элсэлтээр ЭЕШ-д 800 оноо авсан 189 оюутан, 750-аас дээш оноотой 173 оюутан, олимпиад болон англи хэлний шилдэг оролцогчид, байгалийн ухааны салбарт элсэгчид зэрэг Монгол Улсын Их Сургуулийн нэрэмжит тэтгэлэг хүртэх эрхтэй нийт 470 шилдэг элсэгч элсэн орсныг дуулгахад таатай байна.

Мөн бид дотоодын нөөц бололцоондоо тулгуурлан сургуулийн дэд бүтцийг сайжруулах, бүтээн байлгуулалтыг эхлүүлж өнөөдөр 80 жилийн ойн босгон дээр МУИС-ийн багш, оюутанд үйлчлэх төвийн барилгыг хүлээн авахад бэлэн болсноо дуулгахад таатай байна.

Түүнчлэн МУИС-ийн Хууль зүйн сургуулийн шинэ байрны бүтээн байгуулалтын ажлыг эхлүүлж байгаа давхар баярт мэдээтэйгээр түүхэн ойгоо угтаж байна" гэлээ.