Манай тусгай сурвалжлагч С.Ононтуул Арабын Бүгд Найрамдах Египет Улсын Шарм Эль-Шэйх хотоос мэдээлж байна.

Египетийн Шарм Эль-Шэйх хотноо өнөөдөр Уур амьсгалын өөрчлөлтийн асуудлаарх дэлхийн удирдагчдын дээд төвшний уулзалт эхэлж байна. Дээд төвшний энэхүү уулзалтад дэлхийн 110 гаруй улс орны төр засгийн тэргүүнүүд оролцож байгаа бөгөөд Монгол Улсын Ерөнхийлөгч Ухнаагийн Хүрэлсүх тэдний нэг. НҮБ-ын уур амьсгалын өөрчлөлтийн суурь конвенцын талуудын 27 дугаар хурлаар:

• Дасан зохицохуй, алдагдал, хохирлыг бууруулах: Дасан зохицох, алдагдал хохирлыг бууруулах чиглэлээр дэмжлэг үзүүлэх; Глазго-Шарм-Эль-Шейхийн дасан зохицох дэлхийн зорилтыг хэрэгжүүлж эхлэх, ингэхдээ Парисын хэлэлцээрийн хэрэгжилтийг хэмжих дэлхийн хэмжээний хяналт ажлын хөтөлбөрийг хамруула; алдагдал, хохирлын талаар Глазгоугийн яриа хэлэлцээг эхлүүлэх, бодит хэрэгжилтийг хангуулах хүрээнд Сантьягогийн сүлжээ, түүний институцийн бүтцийг эхлүүлэх; Варшавын олон улсын алдагдал, хохирлын механизмын засаглал; тэдгээрийн байгальтай холбох.
• Уур амьсгалын санхүүжилт: урт хугацааны санхүүжилт, 100 тэрбум ам.долларын эх үүсвэр бүрдүүлэх зорилтын биелэлтийг хянах; техникийн хэлэлцүүлгүүдээр дамжуулан хамтын санхүүжилтийн шинэ зорилтуудыг  нарийвчлан тодорхойлох; санхүүжилтийг дэмжих замын зураг; өргөдөл, хүсэлтийг уялдуулах, журмын зохицуулалтыг хялбаршуулах замаар санхүүгийн хүртээмжийг нэмэгдүүлэх; шударга эрчим хүчний шилжилт, түүний дотор нүүрсийг үе шаттайгаар зогсоох, ҮТХН-ийн хэрэгжилтийг дэмжих санхүүжилт; санхүүгийн урсгалыг Парисын хэлэлцээрийн зорилтуудтай уялдуулах, Санхүүгийн байнгын хорооны хүлээгдэж буй ажил, түүний дотор 2.1 хэмд барих заалт, уур амьсгалын санхүүжилтийн тодорхойлолтыг үргэлжлүүлэн авч үзэх;
• Хүлэмжийн хийг сааруулах: 1.5 хэмд хязгаарлах зорилтод хүрэх хүчин чармайлтыг нэмэгдүүлэх; 2030 он хүртэлх хүлэмжийн хийн ялгарлын өнөөгийн зорилтуудыг эргэн харж, сайжруулах; ажлын хөтөлбөрийг эхлүүлэх; ҮТХН-ийн зорилтуудыг илүү тогтвортой хөгжлийн арга замтай уялдуулах; 1.5 хэмд барих зорилгод хүрэх өөрчлөлт, шилжилтийг илүү хурдасгах нөхцөлийг бүрдүүлэх, үүнд хамын ажиллагаа, дэмжлэгийн түншлэлийг бий болгох;
• Парисын хэлэлцээрийн 6 дугаар зүйл: Хяналтын Хороонд (Supervisory Committee) нэр дэвшүүлэхийг дэмжих зэргээр 6 дугаар зүйлийн хэрэгжилтийг сайжруулах; 6 дугаар зүйлийн механизмд оролцох оролцоог дэмжих чадавхыг бэхжүүлэх, тухайлбал буурай хөгжилтэй орнуудын чадавхыг нэмэгдүүлэх.
• Ил тод байдлыг сайжруулах: Сайжруулсан ил тод байдлын тогтолцооны хүрээнд тайлагнах арга хэрэгсэл, дэмжлэгийг эцэслэн боловсруулах, хариуцлагын тогтолцоог эхлүүлэх;  буурай хөгжилтэй орнуудыг ил тод байдлын тайлан бэлтгэж ирүүлэхэд дэмжлэг үзүүлэх.
• Технологи: эрчим хүчний шилжилтийг уур амьсгалын зорилтуудад хүрэх суурь алхам байдлаар түүнд холбогдох технологийн хөгжлийг дэмжих.
• Шинжлэх ухаан, ахиц дэвшлийг үнэлэх: Уур амьсгалын өөрчлөлтийн эсрэг арга хэмжээг түргэсгэх арга зүйн үндсэн дэмжлэг болох шинжлэх ухаан, технологи, мөн удахгүй гарах IPCC -гийн тайлангийн явцыг сайжруулах; Парисын хэлэлцээрийн хэрэгжилтийг хэмжих дэлхийн хэмжээний хяналт болон түүний техникийн яриа хэлэлцээ нь Парисын хэлэлцээрийн хэрэгжилтийг нягт нямбай, интерактив, хүртээмжтэй хянах механизм байх ёстой.
• Ажиглагч байгууллага болон гишүүн бус оролцогч талуудын оролцоо: залуучууд, эмэгтэйчүүд, нутгийн уугуул иргэдийг оролцуулан ажиглагчид болон гишүүн бус оролцогч талуудтай хамтран ажиллах боломжийг нэмэгдүүлэх, Даргалагчийн кампанит ажил, салбаруудын түвшний санаачилгуудын хэрэгжилтийг мөшгих зэрэг юм байна.

Уур амьсгалын өөрчлөлтийн тухай НҮБ-ын талуудын 27 дугаар бага хурал буюу СОР27-г энэ жил Египет улс даргалж байгаа. Арабын Бүгд Найрамдах Египет Улс уур амьсгалын өөрчлөлтийн нөлөөллөөс хүн төрөлхтнийг хамгаалж, холбогдох хэлэлцээрүүдийн хүрээнд зоримог, тууштай арга хэмжээ авахыг талуудад уриалахын зэрэгцээ, бага хурал нь мэтгэлцээнээс илүүтэй хэрэгжилтийн асуудалд төвлөрөх учиртай гэж үзэж байна.

Египет Улс олон талт хамтын ажиллагааг бэхжүүлэх, хамтын чармайлт гаргах нь уур амьсгалын өөрчлөлттэй тэмцэх гол арга зам гэж үздэг. Иймээс бага хуралд эрх тэгш байдал, нийтлэг боловч ялгаатай үүрэг хариуцлагын зарчмыг баримталж, бүх талын бүтээлч оролцоог хангах нь боломжит шийдлүүдийг боловсруулах, үр дүн гаргахад чухал түлхэц болно гэж үзжээ.

Улс орнууд Шотландын Глазгоу хотноо хүлээсэн үүрэг, амлалтаа бүх түвшинд биелүүлж, оролцогч талууд хамтран арга хэмжээ авахгүй бол дэлхий нийтийн өнөөг хүртэл гаргасан хүч чармайлт үр дүнгүй болоход хүрэх тул COP27 бага хурал нь боломжийг зөв ашиглах индэр байх болно гэж тооцоолж байна.

Мөн бага хурал нь дасан зохицоход зориулсан санхүүжилтийг нэмэгдүүлэх хөшүүрэг бөгөөд усны асуудал нь уур амьсгалын өөрчлөлтөд дасан зохицох хэрэгсэл, нөлөөллийг бууруулах гол хүчин зүйл гэдгийг энэ бага хурлаар харуулахыг зорьж байна.

Египет Улс Парисын хэлэлцээрээс хойш уур амьсгалын өөрчлөлтийн эсрэг тэмцэлд Африк тивийг тэргүүлж, ус зэрэг чиглэлээр санаачилга гаргахаар ажиллаж байгаа.

Тухайлбал усны чиглэлд гаргах “Action on Water Adaptation and Resilience” (AWARe) санаачилга нь нэгдүгээрт, дэлхий даяарх усны алдагдлыг бууруулж, усан хангамжийг сайжруулах, хоёрдугаарт, устай холбоотой дасан зохицох үйл ажиллагаа, түүний үр дүнд чиглэгдсэн харилцан тохиролцсон бодлого, арга зүйг боловсруулж, хэрэгжүүлэхэд дэмжлэг үзүүлэх, гуравдугаарт, Тогтвортой хөгжлийн 2030 хөтөлбөр, ялангуяа тогтвортой хөгжлийн зорилго зургааг хангахын тулд ус, уур амьсгалын чиглэлээрх үйл ажиллагааны хамтын ажиллагаа, харилцан уялдаа холбоог дэмжих зорилготой.

Өөрөөр хэлбэл Уур амьсгалын өөрчлөлтийн бага хурлыг даргалагч орны хувьд Онцолж байгаа сэдэв нь УС болж байна.

Египет Улс уур амьсгалын өөрчлөлттэй тэмцэх хамтын чармайлтад хувь нэмэр оруулахдаа аялал жуулчлалын болон археологийн байгууламжийн үр ашгийг байгаль орчинд ээлтэйгээр нэмэгдүүлэхийг зорьж, ногоон шилжилтийг чухалчилж буй.