Манай тусгай сурвалжлагч С.Ононтуул Арабын Бүгд Найрамдах Египет Улсын Шарм Эль-Шэйх хотоос мэдээлж байна.

Цар тахлын улмаас 2020 онд өнжсөнийг эс тооцвол дэлхийн улс орны удирдагчид 1995 оноос эхлээд жил бүр Уур амьсгалын өөрлөлтийн асуудлаар сонгогдсон бүс нутагт чуулдаг.

Энэ жилийн COP27 Арабын Бүгд Найрамдах Египет Улсын Шарм Эль-Шэйх хотноо өнөөдөр (2022.11.07) эхэллээ. Бүрэн эрхээ хэрэгжүүлж эхэлснээсээ хойш Монгол Улсын Ерөнхийлөгч У.Хүрэлсүх дээд хэмжээний энэ уулзалтад хоёрдахиа оролцож байна.

Өнгөрсөн жил Шотландын Глазгоу хотод болсон дээд хэмжээний уулзалтад Ерөнхийлөгч У.Хүрэлсүх оролцохдоо НҮБ-ын индэр дээрээс зарласан “Тэрбум мод” санаачилгаа дэлгэрүүлэн танилцуулж байлаа. Харин энэ удаагийн COP27-д Монгол Улс ямар байр суурьтай оролцохыг маргааш үргэлжлэх Уур амьсгалын өөрчлөлтийн асуудлаарх дэлхийн удирдагчдын дээд төвшний уулзалтын нэгдсэн хуралдаанд Ерөнхийлөгч У.Хүрэлсүхийн хэлэх үг харуулна.

Манай улсын хувьд Уур амьсгалын өөрчлөлтий тухай НҮБ-ын суурь конвенцод 1993 онд нэгдсэн. Үүнийхээ хүрээнд Хүлэмжийн хийг бууруулах, хүлэмжийн хийг шингээхэд хувь нэмрээ оруулах үүргийг хүлээдэг. Монгол Улсын Ерөнхийлөгч У.Хүрэлсүхийн тэрбум мод тарих санаачилга нь хүлэмжийн хийг шингээх Монгол Улсын амлалт биелэх боломжийн эхлэл байсан юм.

Өнөөдөр албан ёсоор эхэлж байгаа Уур амьсгалын өөрчлөлтийн асуудлаарх дэлхийн удирдагчдын дээд төвшний уулзалтад оролцож байгаа Монгол Улсын Ерөнхийлөгч У.Хүрэлсүхийг Арабын Бүгд Найрамдах Египет Улсын Ерөнхийлөгч Абдел Фаттах Аль-Сиси, НҮБ-ын Ерөнхий нарийн бичгийн дарга Антонио Гутерреш нар угтан авлаа.

Энэ удаагийн дээд хэмжээний чуулгад дэлхийн 110 гаруй улс орны төр засгийн тэргүүн оролцож байгаа юм. Сүүлийн жилүүдэд болж буй Талуудын бага хурлаар Парисын хэлэлцээрийн хэрэгжилтийг хангахад чиглэсэн механизмуудын үйл ажиллагаа, уур амьсгалын  өөрчлөлтийн эсрэг урьдчилан сэргийлэх уян хатан бодлого, уур амьсгалд дасан зохицсон, хохирлыг бага түвшинд барих дэд бүтэц, хөдөө аж ахуйн тогтолцоог хөгжүүлэх, нүүрсний эрчим хүчнээс татгалзах, гамшгийн эрсдэлийг бууруулах, хөрөнгө санхүү босгох, технологи, ил тод байдал, чадвар бэхжүүлэх зэрэг асуудлыг хэлэлцэж, уур амьсгалын өөрчлөлттэй тэмцэхэд 100 тэрбум ам.долларын санхүүжилтийг хөгжингүй орнууд манлайлан босгохыг уриалж байгаа билээ.

Нэг ёсондоо COP27 бол хэлэлцээрээс хэрэгжилт рүү шилжиж, Глазгоугийн үр дүнгийн ахиц дэвшлийг харуулах цаг ирснийг сануулан эхлэж байна.