НҮБ-ын мэргэжилтнүүд долоодугаар сарын 11-нд тэмдэглэдэг дэлхийн хүн амын өдрийг тохиолдуулан “Дэлхийн хүн амын хэтийн төлөв 2022” тайлангаа нийтэлсэн. Тус тайланд Энэтхэг улс 2023 онд дэлхийн хамгийн олон хүн амтай улс болно гэх үзүүлэлт бий. Харин Энэтхэг улс БНХАУ-ыг гүйцэхээс өмнө дэлхийн хүн ам 8 тэрбумд хүрнэ гэж мэдэгдэж байв.
Иймд НҮБ-ын таамаг буюу хэтийн төлөв үнэн зөв бол арваннэгдүгээр сарын 15-нд Дэлхийн 8 тэрбум дахь хүүхэд мэндэлнэ.
Тайланд мөн одоогийн байдлаар дэлхийн хүн ам 1950 оноос хойш хамгийн удаан хурдацтайгаар өсөж байгааг онцолжээ.
Дэлхийн хүн ам 2030 онд 8.5 тэрбумд хүрэх бол 2050 онд 9.7 тэрбум болно. Шинжээчдийн үзэж байгаагаар, дэлхийн оршин суугчдын тоо 2080-аад онд 10.4 тэрбум болж оргилдоо хүрэх бөгөөд 2100 он хүртэл энэ түвшинд байх аж.
Д.Батчулуун
