Томуу, томуу төст өвчний нөхцөл байдал, дархлаажуулалт болон ерөнхий боловсролын сургуулиудын хичээл эхлэхтэй холбогдуулан зөвлөмж, мэдээлэл өгч байна. Энэ үеэр ХӨСҮТ-ийн захирал Ц.Билэгтсайхан мэдээлэл өглөө. 

Тэрбээр "Замын-Үүд боомт нээгдсэнтэй холбоотойгоор ажлын хэсэг гарсан. Тус ажлын хэсэгт Үндэсний төв, Эрүүл мэндийн яам, мэргэжлийн хяналт, гаалийн байгууллагууд хамтран ажиллаж байна. Үндэсний төв нь боомтоор ирж буй гаднын болон дотоодын иргэдэд тандалт шинжилгээг түүвэрлэн хийж байгаа. Гаднын болон дотоодын 365 хүнээс шинжилгээ авсан байна. Одоогоор эерэг тохиолдол гараагүй.

Иргэдийн дунд цагаан сарыг тохиолдуулан урд хөрш рүү зорчих төлөвлөгөө бий байх. Тэдгээр иргэддээ анхааруулгыг мөн хүргэж байна. Хамгийн гол нь хувь хүн өөрсдийгөө хамгаалах маск зүүх хэрэгтэй. Урьдчилан сэргийлэх тарилгаа хийлгэчихээд аялал зугаалганд явах нь эрсдэлээс хамгаалж байгаа хэлбэр юм. 

Энэ долоо хоногт ХДХВ/ДОХ гэсэн онштой үйлчлүүлэгч нас барсан тохиолдол гарсан. Энэ онош бол нууцлалын түвшинд хамаарагддаг. ХӨСҮТ-ийн хашаанд эмнэлгийн тусламж авч чадалгүй нас барсан гэх худал мэдээлэл нийгмийн сүлжээнд тархсан. Бодит байдал дээр бол гэртээ харамсалтайгаар нас барсан. Тиймээс бодитой эх сурвалжаас мэдээлэл авахыг хүсэж байна" гэв. 

Д.Батчулуун