Өнгөрсөн долоо хоногийн сүүлээр ОХУ-ын хөлсөлсөн Вагнерын арми эзэн рүүгээ дайрах нохой шиг авир гаргасан. Одоо бол дүгнэх, найрамдах, эвлэрэх цаг нь. Эсвэл зүгээр л алалдах өөр нэг шалтгааныг үгсэн тохирох цаг ч юм уу. Ямартай ч нам жим, гэхдээ дэлхий нийтийн чихний дэргэд буй асуудал. 

Вагнерын хагас цэрэгжүүлсэн бүлгийн удирдагч Евгений Пригожин ОХУ-ын Ерөнхийлөгч Владимир Путины хүчнийхэнтэй зайлшгүй сөргөлдөөнийг зогсоож байгаа тухай таатай мэдээг бид дуулсан. Зарим нь үүнийг төрийн эргэлт, зарим нь иргэний дайн гэж нэрлэж байсан ч үнэн хэрэгтээ үзэл бодлын зөрчилдөөн хийгээд үгээр ойлголцоогүй эрчүүдийн тоглоом төдий зүйл байх л даа. Пригожин цэргүүдээ Москвагаас өөр зүгт эргүүлж, Беларусийн зүг явсан гэх. Тэнд орогнож буй гэх яриа. Чухамдаа Путин тэр хоёрын барьсан байшин одоо балгас болсон түүх. 

Украины дайн үнэн хэрэгтээ тулалдаж, үхэх нь баатарлаг зүйл гэж цээжээ дэлдэгч Орос эрсийн айдас болж хувирсныг томоохон хэвлэлүүд бичиж байгаа. Ямартай ч барууны зарим томчуулын үзэж буйгаар Вагнерын уг бослого нь ОХУ-д цэргийн хүч суларч, хагарал үүсэж байгаагийн тод илрэл болоод буй. Баасан гаригт Пригожин Украинд эхлүүлсэн дайныг авлигад идэгдсэн элитүүдийн бичсэн ЗОХИОЛ хэмээн дүрсэлсэн 30 минутын видео бичлэгийг нийтэлсэн нь дайны хамгийн оргил мөчүүдийн нэг байсан. Гэхдээ тэр Путины тухай шууд дурсахаас болгоомжилсонг харж болно. Бага зэргийн айдас. Гэхдээ эр зориг нь илүү.

Пригожин хэлэхдээ "Оросыг удирдаж буй олигарх овогтонд энэ дайн хэрэгтэй байсан. Сэтгэцийн өвчтэй новшнууд. Зүгээр дээ, бид дахиад хэдэн мянган орос эрчүүдийг их буун дор сөхрүүлье. Тэд их бууны галын дор үхэх болно, бид хүссэн зүйлээ авах болно” гэсэнг онцолж болно. 

Мэдээжийн хэрэг Пригожин Оросын төр, армийг идэж буй авлигын талаар анх удаа ингэж шууд ярьсан хэрэг биш л дээ. Тэрбээр өнгөрсөн сард Кремлийг дэмжигч блогчин Константин Долговтой ярилцаж, "Элитийн хүүхдүүд интернет ухаж, цөцгийтэй талх идэж байхад жирийн хүмүүсийн хүүхдүүд тулаанд ханцуй шамлан орж, эцэг эх, эхнэр хүүхдээ өнчрүүлж байгаа" гэх үзэл санаа суусан. Түүнчлэн дайн Украиныг хүчгүйдүүлэх зорилтынхоо нэгийг нь ч биелүүлээгүйг дурдаад Пригожин хэлэхдээ "Хэрэв Украинчууд өмнө нь 500 танктай байсан бол одоо 5000 танктай болсон. Тэр үед 20 мянган байлдагч ур чадвартай байсан бол одоо 400 мянга болсон” гэж хэлжээ. 

Пригожин Беларусид тайван байж чадах уу?

Энэ нь их эргэлзээтэй асуудал гэж харж байгаа. Хэдийгээр тэр Путины урт гараас мултарсан ч цаана нь олон аюул отож буйг бодолцох хэрэгтэй. Путин түүнийг буулгаж болох ширүүн сөргөлдөөнөөс татгалзаж чадсан. Гэсэн хэдий ч Пригожины цэргүүд хөдөлж байх үед "Эх орноосоо урвах замаар явж байгаа бүх хүмүүсийг шийтгэнэ" гэж орон даяар, өргөн дэлгэцээр өгсөн амлалтаасаа тэр няцахаас өөр аргагүйд хүрчээ. Оросоос урвасныхаа төлөө хариуцлага хүлээх нь мэдээжийн хэрэг. Гэхдээ дайны хүнд цагт даруухан шийдэх ёстой асуудал үүнээс өөр байхгүй. 

Уг асуудал Путины төр барих хугацаанд тулгарсан хамгийн том сорилт байлаа. Пригожины баасан гарагт телеграмд байршуулсан 30 минутын видеог хээрийн цэргийн анги нэгтгэлүүд хийгээд Оросын сая сая хүн үзсэн нь гарцаагүй. Түүнчлэн Долговтой хийсэн яриаг нь олон сая хүн үзэж, үзэл бодлын өөрчлөлттэй нүүр тулж байгааг ч олон улсад дурдаж байна. 

Үргэлжлэл бий...

Л.Сайнаа

Эх сурвалж: CNN