Монголын хадгаламжийн даатгалын корпорациас Олон Улсын Хадгаламжийн Даатгагчдын Холбоо (IADI)-той хамтран анх удаа Евро-Азийн бүсийн хорооны 2023 оны жилийн уулзалт хурал болон “Ялгавартай хураамжийн тогтолцоог нэвтрүүлж, хэрэгжүүлэх нь” сэдэвт олон улсын семинарыг 2023 оны 6-р сарын 28-30 ны өдрүүдэд Улаанбаатар хотноо зохион байгуулах гэж байна.

Энэ жилийн уулзалт, семинарыг Монгол улсад зохион байгуулах болсон нь Монголын хадгаламжийн даатгалын үйл ажиллагааны хөгжлийн явцыг олон улсад таниулах, олон улс дахь байр суурийг бэхжүүлэх зорилготой юм.

Мөн олон улсад түгээмэл хэрэглэгддэг “Ялгавартай хураамжийн тогтолцоо”-г нэвтрүүлэх хэтийн зорилгын хүрээнд олон улсын сайн туршлагуудтай танилцаж, судлах, зөвлөгөө, мэдээлэл авах, ингэснээр өөрийн орны онцлогт тохирсон  арга замыг тодорхойлох, оновчтой шийдэлд хүрэх боломжийг бүрдүүлж өгөх ач холбогдолтой аж.

Гурван өдрийн турш үргэлжлэх арга хэмжээнд Евро-Ази бүсийн хорооны гишүүн улс болох Армен, Азербайжан, Гүрж, Казахстан, Киргиз, Турк, Узбекстан зэрэг орнуудаас гадна Олон Улсын Хадгаламжийн Даатгагчдын Холбоо, Европын банкны газар, АНУ, Япон, Өмнөд солонгос, аргентин, Швейцарь, Малайз, Тайван, Колумба, Мексик, Энэтхэг, Вьетнам, Филиппин, Зимбабе зэрэг бусад бүсийн орнуудын зочид, төлөөлөгчид оролцоно.

Манай улс 2013 онд Олон Улсын Хадгаламжийн Даатгалын Холбоонд гишүүнээр элссэн түүхтэй. Өнгөрөгч 2022 оноос уг холбооны Евро-Ази бүсийн хорооны даргаар Монголын хадгаламжийн даатгалын корпорацийн гүйцэтгэх захирлын үүрэг гүйцэтгэгч С.Баатарсүрэн нь томилогдон ажиллах болсон.

Манай Улсад одоогоор хадгаламжийн даатгалын гишүүн банкнуудаас ижил суурьтайгаар даатгалын хураамжийг тооцдог. Цаашид банкнуудад эрсдэлийн түвшнээ бууруулж ажиллах хөшүүрэг болох, морал хазардыг бууруулах зэрэг давуу талтай ялгавартай хураамжийн тогтолцоог нэвтрүүлэх зорилт тавин ажиллаж байгаа юм.

https://earc2023dicom.com/ , www.dicom.mn  утас: 70128448