Улсын Гуравдугаар Төв Эмнэлэг БНХАУ-ын Рүижин эмнэлэгтэй хамтран Монголд анх удаа хөлдөөх аблацийн эмчилгээг нэвтрүүлсэн талаар Зүрх судасны үндэсний төвийн дарга, зүрхний хэм судлалын эмч Х.Мөнгөн-Өлзий мэдээлэл өглөө.
Тэрбээр, "Манай эмнэлэг бүх төрлийн суулгац эмчилгээг хийдэг. Энэ төрлийн хагалгаанд жилд 300 орчим хүн, түлэх эмчилгээнд жилд 150-180 хүн ордог. Хугацаа их шаарддаг тул олон хүнийг богино хугацаанд эмчлэх боломжгүй байлаа.
Харин өнөөдөр хөлдөөх эмчилгээний технологийг улсдаа шинээр нэвтрүүллээ. Энэ нь зүрхний тосгуурын жирвэгнээ өвчинд чиглэнэ. Эл өвчин нь тархинд цус харвалт үүсгэж, гэнэтийн нас баралтыг бий болгодог.
Анхны хагалгааг маргааш эхлүүлнэ. БНХАУ-д анх удаа хөлдөөх эмчилгээг нэвтрүүлсэн, эмчилгээний удирдамж зааврыг нь бичсэн профессор хүрэлцэн ирсэн.
Хөлдөөх эмчилгээний тухайд илүү хялбар хийгдэх боломжийг бүрдүүлж байна. Мэс ажилбар нэг цаг 30 минут үргэлжилж, хөлдөөх процесс 20-30 минутын дотор дуусна. Мөн мэс заслын үеийн эрсдэл буурч, үр дүнгийн хувьд хангалттай өндөр гэж үзэж байна" гэв.
