Улсын их баяр наадмын босгон дээр манай сайтын сурвалжлах баг Сүүж уулын амралтад наадмын бэлтгэлээ хангаж буй Завхан аймгийн бөхчүүдийг зорьсон юм. Ийнхүү наадмын бэлтгэл сургуулилтынх нь талаар Улсын начин Ш.Уламбаяртай ярилцлаа.

-Сайхан зусаж байна уу? Баяр наадмын бэлтгэл хэр хангагдаж байна вэ? 

-Бэлтгэл сургуулилтдаа уламжлал ёсоор Сүүж уулын амралтад зургаадугаар сарын 18-нд Завхан Даян дэвжээнийхээ бөхчүүдтэй бэлтгэлээ хангаж байна. Энэ жил бөхчүүд маань их сайхан өнгөтэй байна. Бүгд хүссэн цолондоо хүрэх байх гэж бодож байна. 

-Та бөхийн галд хэд дэх жилдээ гарч байна вэ? 

-Би анх 1996 онд "Хүч" спорт хорооны залуу бөх гээд бэлтгэлд гарч байлаа. Тэр цагаас хойш 29 жил болсон байна. Төрийнхөө наадамд 28 дахь жилдээ зодоглохоор бэлтгэлээ хийж байна даа. 2004 онд Улсын начин цол хүртсэн. Улсын цолонд хүрснээс хойш 20 гаруй жил болжээ. 

-Та энэ жил галынхаа бөхчүүдээс цолоо ахиулах бөхийг хэн гэж харж байна вэ? 

-Манай галд Аймгийн арслан Б.Нармандах, Д.Батбаатар нарыгаа улсын цолонд хүрчих болов уу гэсэн бодолтой байна. Мөн өнгөнд барилдчихаад залуу харцага, заанууд олон бий. Энэ хэд маань бэлтгэл сургуулилтаа сайн хийгээд дээшээ барилдах болов уу.

Тухайн өдрийн од нь гийсэн бөх л дээшээ барилдана даа.

Бэлтгэл ер нь дуусах тийшээ хандаж байна. Залуу бөхчүүд аймаг сумынхаа наадамд оролцохоор явсан. Энд улсын наадамд зодоглох бөхчүүд байна. 

-Завхан дэвжээ анх хэрхэн байгуулагдаж байсан бэ? 

-Завхан дэвшээг анх Улсын гарди Ц.Цэрэнпунцаг санаачлан зохион байгуулж байсан. Нутгийнхаа бөхчүүдийг ахлаад бэлтгэл сургуулилт хийж байсан юм. Тэр цагаас хойш олон сайхан цолтон төрсөн. 

-Та наадамчин олондоо мэндчилгээ дэвшүүлэхгүй юу? 

-Наадамчин олон минь улсынхаа баяр наадамд сайхан баярлаарай хэмээн мэндчилгээ дэвшүүлье. 

-Ярилцсанд баярлалаа. 

А.Сүх