Улсын их баяр наадмын босгон дээр манай сайтын сурвалжлах баг Сүүж уулын амралтад наадмын бэлтгэлээ хангаж буй Завхан аймгийн бөхчүүдийг зорьсон юм. Ийнхүү наадмын бэлтгэл сургуулилтынх нь талаар Улсын начин Т.Дүгэрдоржтой ярилцлаа.
-Сайхан зусаж байна уу? Баяр наадмын бэлтгэлээ хэзээнээс хангаж байна вэ?
-Наадмын бэлтгэлдээ зургаадугаар сарын 11-нээс гарсан. Энэ жил хоёр дэвжээ маань нэгдээд өргөн бүрэлдэхүүнтэй бэлтгэлээ хийж байна.
-Та бөхийн галд хэд дэх жилдээ гарч байна вэ?
-Би 2014 онд Завхан аймгийнхаа Даян хайрханд анх бэлтгэлд гарч байсан. Тэр цагаас хойш наадмын бэлтгэл тогтмол гарч байна даа. Сүүж уулын амралтад 2015 оноос хойш гарч байгаа. Энэ жил арав дахь жилдээ гарч байна.
-Та энэ жил галынхаа бөхчүүдээс цолоо ахиулах бөхийг хэн гэж харж байна вэ?
-Хүн болгон л цолоо ахиулъя, дээшээ барилдъя, амжилтаа бататгая гэж дор бүрнээ зорьж байгаа. Энэ жил нутгийн маань бөхчүүд өнгөтэй сайхан байна. Нутгийнхаа арслангуудыг улсын цолонд хүрэх байх гэж харж байна даа.
-Та наадамчин олондоо мэндчилгээ дэвшүүлэхгүй юу?
-Монгол хүн болгон л наадмаар гоё сайхан хувцасаа өмсөж, сайн сайхан бүхнийг боддог. Тэр ч утгаараа наадмын өдрүүдэд уул хангай, дэлхий баясаж хураа хайрладаг шүү дээ. Наадам гэхээр хүн бүр л омогшиж, монгол уламжлалаараа бахархдаг. Түүний адил л наадамаа хүлээн доглолдог. Наадамчин олондоо ирж буй наадамдаа сайхан наадаарай хэмээн мэндчилгээ дэвшүүлье.
-Ярилцсанд баярлалаа.
Д.Батчулуун
