Сүүлийн үеийн бүхий л хит дуунуудын шүлгийг Э.Золзаяа буюу бидний мэддэгээр ZZ хэмээх залуу бичиж байгаа. МУГЖ, дуучин Б.Сарантуяагийн “Өнөөдөр ирсэн дурлал”, “Вива”, “Киви” хамтлагийн “Болдоггүй шүү”, “Hot Line”, “Гурван охин” хамтлагийн “Stupid boy” гээд түүний зохиосон шүлгүүд цөөнгүй.  Ихэвчлэн эмэгтэй дуучидтай хамтран ажилладаг тэрээр эмэгтэйчүүдийг хөндлөнгөөс харахдаа өөрт буусан сэтгэгдлээ бичдэг аж.  Шүлэгч бүр өөрийн зохиосон шүлгээрээ ном эсвэл уран бүтээлийн тайлан тоглолт хийх хүсэлтэй байдаг болов уу. Тэгвэл энэ удаад ZZ анхны бие даасан тоглолтоо өөрийнхөө төрсөн өдрөөр хийх гэж байгаа юм байна. Тэрээр 1981 оны 11 дүгээр сарын 11-ний 11 цагт төрсөн юм байна. Тиймдээ ч 11-ийн тоог ихэд бэлгэддэг ажээ. Тиймээс тоглолтоо  “Number-11” хэмээн нэрлэж байгаа. Төрсөн өдрийн баяр, шоу тоглолт хэлбэрээр болох энэ үдэш түүний зохиосон шүлгүүдийг дуулж амилуулсан уран бүтээлчид хүрэлцэн ирж, хамтран туурвисан уран бүтээлээ үзэгчдэд сонордуулна. Тоглолтонд 20 гаруй хамтлаг, дуучид оролцохоос гадна тэрээр өөрөө ч дуулна. Учир нь ZZ цагтаа залуусыг реп хэмнэлээр байлдан дагуулж байсан “Мон-та-реп” хамтлагийн дуучин юм. Тоглолт энэ сарын 9-нд Монгол бөхийн өргөөнд болно.