Хүнс, хөдөө аж ахуй, хөнгөн үйлдвэрийн сайд Ц.Идэрбат өнөөдөр цаг үеийн асуудлаар мэдээлэл хийлээ. Тэрбээр мэдээллийнхээ эхэнд газар тариалангийн салбарын нөхцөл байдлын талаар танилцуулав. 

Хүнс, хөдөө аж ахуй, хөнгөн үйлдвэрийн сайд Ц.Идэрбат: "Засгийн газраас гаргасан тогтоол, шийдвэрийн хэрэгжилт болон өвөлжилтийн бэлтгэл ажилд хүнс, хөдөө аж ахуйн салбартай холбоотой олон заалт бий. Улсын хэмжээнд төлөвлөсөн тариалалтыг бүрэн хийж, нийт 530 мянган га талбайд шаардлагатай таримлуудыг тариалсан. Улаанбуудайн тариалалтын нэгдсэн мэдээллийг наймдугаар сарын 20-нд гаргах бөгөөд үүний дараа энэ жилийн ургацын хэмжээ, чанарын талаар илүү тодорхой мэдээлэл өгнө.

Газар тариалан эрхлэгчидтэй уулзаж, улаанбуудайг улсын нөөцөд худалдаж авах үнийг хэлэлцэх шаардлагатай. Намрын газар тариалангийн хураалтад  анхаарч байгаа дараагийн асуудал бол шатах тос, тосон материал байгаа. Төрөөс хавар хөнгөлөлттэй үнээр шатахуун олгосон. Энэ намрын хувьд шатахуунаар таслахгүй байхад анхаарч, шатахууны худалдан авалтыг сарын өмнөөс зохион байгуулж ажиллаж байна.

Ирэх сарын 4-ний өдөр 3.2-3.5 мянган тонн шатахууныг хөдөө хөдөө аж ахуйн корпорацийн нөөцийн саванд хадгалах зорилттой байна.

Шүлхийн вакциныг жилд хоёр удаагийн давтамжтай хийдэг. Өвөл мал сульдаж, ядарсан байх үед шүлхийн вакциныг хийхэд малчид дургүйцдэг, дээрээс нь үр дүн муутай байдаг. Тиймээс энэ жил малын тарилгыг намар эрт эхлүүлэхээр төлөвлөж байна. Мөн шүлхий өвчин гарсан газруудад хариуцлага тооцож байгаа. Энэ хүрээнд гурван аймгийн Мал эмнэлгийн газрын даргыг үүрэгт ажлаас нь чөлөөлсөн. Удахгүй Монгол Улс дотооддоо шүлхийн вакцин үйлдвэрлэхээр ярьж байна. Өөрөөр хэлбэл, бид вакцинд жилдээ 30 гаруй тэрбум төгрөг зарцуулж байгаа. Тиймээс вакциныг дотоодын эрдэмтэн судлаач болон хоёр хөршийн хамтын ажиллагааны хүрээнд өөрсдөө хамтарч хийнэ.

Малын гаралтай түүхий эдийн засгийн эргэлтэд оруулна. Энэ хүрээнд таван аймгаас арьс шир худалдан авах ажлыг хийнэ. Сүүлийн жилүүдэд цагаан алт хөтөлбөрийн хүрээнд аж ахуй нэгжүүдийн техник технологи илүү сайн хөгжсөн. Тиймээс хөдөө аж ахуйн салбарт нийслэл болон Хөдөө аж ахуйн яам ямар хөрөнгө оруулалт хийх асуудлыг улсын төсөвт хэрхэн тусгах талаар давхар ярина.

Мөн гурван банкаар дамжуулан 200 орчим тэрбум төгрөгийн хөнгөлөлттэй зээлийг 15 чиглэлээр олгохоор ярьж байна. Үүнд, мах махан бүтээгдэхүүн, сүү болон сүүн бүтээгдэхүүн, арьс шир, зоорь гэм мэт зүйлс хамаарах юм.

Малын ясаар хийсэн бордооны үр дүн энэ намраас гарч ирнэ. Хэрэв үр дүнтэй байвал улаанбуудайн урамшуулал өгч байгаа газруудад шууд малын ясаар хийсэн бордоог олгоно" хэмээв.