Өчигдөр буюу наймдугаар сарын 18-ны өдөр Монголд нэгэн аваргын төрсөн өдөр, Солонгост бас нэгэн “аваргын” төрсөн өдөр тохиожээ. Үндэсний бөхийн дэвжээнд Дархан аварга Н.Батсуурь 39 нас хүрсэн бол K-pop-ийн ертөнцөд G-Dragon 38 насны төрсөн өдрөө тэмдэглэв. Н.Батсуурь 1987 онд, G-Dragon 1988 онд төрсөн, насны зөрүү нь ердөө нэг жил.

Гэхдээ энэ хоёрын “ертөнц, салбар” нь тэс өөр. Нэг нь дэвжээн дээр өрсөлдөгчөө уран мэхээр давахад, нөгөө нь тайзан дээр үзэгчдийг дуу хөгжмөөрөө байлдан дагуулдаг. Нэг нь нь зодог шуудаг өмсдөг, нөгөөх нь микрофон, хөгжим, этгээд загвараараа онцгой.

Н.Батсуурь таван настайдаа цэцэрлэгийн үндэсний бөхийн барилдаанд түрүүлж, 3000 төгрөгөөр шагнуулж байсан түүхтэй. Тэр 2013 онд улсын харцага, 2014 онд улсын арслан, 2018 онд улсын аварга болж, улмаар 2024 онд Дархан аварга цол хүртсэн.

Харин G-Dragon зургаан настайгаасаа урлагийн замд хөл тавьж, улмаар BIGBANG хамтлагийн ахлагч, реппер, дуу зохиогч, продюсер төдийгүй загварын ертөнцийн нөлөө бүхий дүр болсон. Түүний 2009 оны “Heartbreaker”, 2012 оны “Crayon”, 2013 оны “Crooked” зэрэг уран бүтээлүүд өнөөдөр ч түүнийг төлөөлдөг хитүүд хэвээр. 

Ингээд бодохоор хоёр аваргын амьдралын замналд нэг сонин төстэй зүйл бий. Нэг нь Монголын наадмын дэвжээнд олонтоо “ес давж” нэрээ мөнхөлсөн бол нөгөө нь хөгжмийн тайзан дээр хит дуу, содон хэв маягаараа олон жил урлагийн хатуу хөтүүг “давж” ирсэн.

Бүр хөгжилтэйгээр хэлбэл, Н.Батсуурь дэвжээн дээр уран мэхээ үзүүлж байхад G-Dragon тайзан дээр уран хөдөлгөөнөө үзүүлдэг. Нэгийг нь Монгол үндэсний бөхийн орчин цагийн домог, нөгөөг нь “K-pop-ийн домог” гэж хэлж болно.

Л.Баяр