Замын түгжрэлийг багасгах үүднээс баруун талдаа жолооны хүрдтэй буюу бидний хэлдэгээр буруу талдаа жолоодлоготой автомашиныг улсын дугаарын хязгаарлалттай адилхан хотын төвийн замуудаар долоо хоногийн ням гарагт замын хөдөлгөөнд оролцохыг хязгаарлана хэмээн яригдах болсон билээ. Тэгвэл энэ талаар албаныхан ингэж үзэж байгаа аж. Тэдний хэлж буйгаар "Монгол Улсын замын хөдөлгөөний дүрэмд зааснаар зүүн талдаа жолооны хүрдтэй тээврийн хэрэгслээр тээвэрлэлт гүйцэтгэх ёстой.  Тиймээс ч  бүх дүрэм журам нь зүүн талдаа жолооны хүрдтэй тээврийн хэрэгсэлд зориулагдсан байдаг. Ер нь зүүн, баруун талдаа жолооны хүрдтэй машин холилдон явж байгаа орон Монголоос өөр байхгүй. Зөвхөн зүүн талдаа жолооны хүрдтэй тээврийн хэрэгслийг замын хөдөлгөөнд оролцуулах, баруун талдаа буюу буруу талдаа жолооны хүрдтэй тээврийн хэрэгслийг явуулахгүй байх ямар нөхцөл байна гэдгийг 2-3 сарын хугацаанд судалж үзэхэд дэлхийн 190 гаруй орноос 56 орон нь баруун талдаа жолооны хүрдтэй тээврийн хэрэгсэлтэй байна" гэжээ.

Америк, Австрали, Канад зэрэг өндөр хөгжилтэй орнууд буюу 133 орон зүүн талдаа жолооны хүрдтэй тээврийн хэрэгсэлтэй байдаг байна. Гэхдээ амралтын өдрүүдэд баруун талдаа жолооны хүрдтэй тээврийн хэрэгслийг явуулах үгүйгээ нийслэлийн иргэд санал асуулгаар шийдэх юм байна. Эхний ээлжинд энэ оноос баруун талдаа жолооны хүрдтэй машиныг импортоор оруулж ирэхийг хориглох аж. Сүүлийн үед хийсэн судалгаанаас харахад өнгөрсөн гурван жил 28 орчим мянга осол зөрчил гарсанаас 51.6 хувь нь баруун талдаа жолооны хүрдтэй тээврийн хэрэгслүүдээс болж гарсан байдаг байна. Тиймээс иргэд сүүлийн 5-10 жил унах тээврийн хэрэгсэл авахаар төлөвлөж байгаа бол зүүн талдаа жолооны хүрдтэй тээврийн хэрэгсэл авах хэрэгтэй гэж зөвлөж байна. Одоогийн байдлаар хөдөлгөөнд оролцож байгаа нийт тээврийн хэрэгслийн 58 хувь зүүн талдаа жолооны хүрдтэй, 42 хувь нь баруун талдаа жолооны хүрдтэй тээврийн хэрэгсэл байдаг байна.