ОХУ-ын Ерөнхийлөгч Владимир Путин өнгөрсөн пүрэв гарагт Буриадад айлчиллаа. Тэрээр өглөөний 11.00 цагт Улаан-Үүдийн нисэх онгоцны буудалд газардсан байна. Төрийн тэргүүний айлчлалтай холбогдуулан Онохойгоос Улаан-Үүд хүртлэх замыг хааснаас гадна цагдаагийн бие бүрэлдэхүүн харуул хамгаалалтад олноор дайчлагджээ. Ийнхүү В.Путин хөгжингүй орны жижиг дүүрэгтэй тэнцэхүйц Улаан-Үүд хотод айлчилсан цөөхөн төрийн тэргүүний нэг болов.


В.Путин онгоцны буудлаас шууд Итгэлт хамбын занданшуулсан шарил байдаг Ивлэгийн дацан руу машины цуваатай хөдөлжээ. Түүнийг Ивлэгийн дацанд ирэхээс өмнө хэд хэдэн удаа эргэдэг суурь машин хийдийн аюулгүй байдлыг шалгасан байна. Ерөнхийлөгчийг Оросын бурхны шашинтнуудын тэргүүн, хамба лам Дамба Аюушев болон хийдийн 200 гаруй лам хадаг барин угтжээ.

Хамба лам, Оросын тэргүүн хоёр Буддагийн хөшөө, лам нар, нум сум, тэмцлийн тухай зэрэг олон сэдвээр халуун дотно яриа өрнүүлсэн байна.


Ерөнхийлөгч Буддын лам нар бүх цаг үед ялангуяа дэлхийн нэг, хоёрдугаар дайны үед олон хүмүүст туслаж байсныг цохон тэмдэглэсэн аж. Мөн тэрээр Зөвлөлтийн он жилүүдэд лам нарыг шахан хавчиж байсанд харамсаж байгаагаа илэрхийлээд “Буддизм бол хүнлэг энэрэнгүй байдал, бие биенээ, эх орноо хайрлахыг заадаг сайн шашин” хэмээн хэлсэн байна. Лам нарыг их сургуульд суралцуулахад тулгамдсан асуудалд В.Путин “Бид сайн харилцаатай. Цаашид ч энэ харилцаа үргэлжлэх болно. Лам нарыг Москвагийн их сургуулиудад суралцуулах талаар хэлэлцэж болно. Энэ асуудалд 100 хувийн дэмжлэг үзүүлнэ. Бид чадах чинээгээрээ шийдвэрлэнэ” хэмээн хэллээ.


Өнгөрсөн наймдугаар сард болсон Халимагийн залуучуудын төлөөлөгч уулзалтын үеэр нэгэн оюутан В.Путинээс Далай ламыг эх орондоо авчирч чадах эсэх талаар зориглон асуусан юм. Харин энэ үед Ерөнхийлөгч нэлээд бөөрөнхий хариулт өгч байсан. Тэрээр “Халимагт амьдардаг манай иргэд Далай ламыг хүлээж байгааг бид мэдээж ойлгож байна. Энэ чиглэлээр ажиллах болно” гэж хэлснийг Далай ламын албан ёсны веб хуудас “Тийм” ба “Үгүй” гэдэг шууд хариултаас зайлсхийсэн хэмээн бичиж байсан. Далай ламыг авчрах эсэх нь Хятадтай харилцах харилцаанд ямар том бэрхшээл үүсгэхийг Оросын тэргүүн мэдэж байсан нь гарцаагүй. Гэхдээ энэ хариултаас дүгнэхэд найман сарын өмнө В.Путины буддын шашныг харах өнцөг одоогийн дэмжлэг үзүүлэх амлалтын хаана ч хүрэхгүй байсан.


Оросын Ерөнхийлөгчийн Буриадад айлчилсан гол зорилго нь ой модны үйлдвэрлэлийн асуудлаар төрийн зөвлөлийн хуралдаан хийлгэх байв. Гэсэн хэдий ч тэрээр шууд Ивлэгийн дацан руу явж, хамба ламтай уулзан буддын шашныг дэмжихээ илэрхийллээ.

ОХУ-аас монгол туургатанд хандаж буй эерэг харилцааг холбон үзвэл сарын өмнө Дэлхийн шатрын холбооны Ерөнхийлөгч Кирсан Илюмжинов Монголд айлчилсан. Түүнийг олон улсын шинжээчид ДШХ-ны тэргүүнээс олон улсын харилцаанд гадна маш том зуучлагч хэмээн хардаг.

Мөн Халимагийн өмнөх тэргүүн Кирсан Илюмжиновыг шүүмжилдгээсээ болж хавчигдан хөөгдөж, Монголын харьяат болох дээрээ тулж явсан хөөмийч, жангарч Цагаанзам хэдхэн хоногийн өмнө төрөлх Элстэй хотдоо тоглолт хүртэл хийсэн байна.

В.Путин маргааш Халимагт айлчилна хэмээн 24 цагт ойрын эх сурвалж мэдээллээ.

Энэ бүхнээс үзвэл түүний айлчлалын зорилго зөвхөн модны үйлдвэрлэлийн асуудал биш бололтой. Оросын төрийн тэргүүн монгол үндэстэн олноор амьдардаг хоёр республиктээ дараалан очиж ажиллаж байгаа нь тохиолдол уу, бодлого уу гэдэг нь сонирхол татаж байна.